Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 259 Hüküm no: 367 Orijinal metin no: [35a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan b. Seyyid Osman’ın Ali Yazıcı b. Abdullah aleyhine açtığı alacak davasında yüz yirmi guruşa sulh olduğu Arzuhâl eden es-Seyyid Hasan b. es-Seyyid Osman Galata’da mahfil-i kazâda derûn-ı arzuhâlde mezkûrü’l-ism Ali Yazıcı b. Abdullah muvâcehesinde mezbûr Ali Yazıcı zimmetinde karz unvânıyla yedime i‘tâ eylediği temessük mantûkunca manav gediği tâ‘bir olunur âlât-ı lâzıme ve eşyâ-i ma‘lûme semenlerinden iki yüz yetmiş guruşdan bâkī iki yüz guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Ali Yazıcı ile yüz yirmi beş guruşa ba‘de’s-sulh ve’l-kabûl bedel-i sulh-ı merkūmdan mâ‘adâya müte‘allika da‘vâdan merkūm Ali Yazıcı’nın zimmetini ibrâ ve iskāt eylediğimde ol dahi ber-vech-i muharrer ibrâmı ba‘de’l-kabûl bedel-i sulh-ı merkūm yüz yirmi guruşu hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı merkūm yüz yirmi beş guruşun müdde‘î-i mezbûra edâsıyla mezbûr Ali Yazıcı ilzâm olunduğu bi’l-iltimâs [huzûr-ı âlîlerine i‘lâm olundu.] Fî 18 Receb sene [1]221.