Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 259 Hüküm no: 368 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankaralı Bedros v. Kirkor’un Halebli Nasrala v. Bedros aleyhine açtığı alacak davasında iddiasını ispat edemediği Ankaralı Bedros v. Kirkor zimmî Galata’da mahfil-i kazâda İngiltere tercümânlarından Halebli Nasrala v. Bedros muvâcehesinde diğer tercümân Mezriko Pizani hâzır olduğu hâlde mersûm Nasrala[‘ya] şehriye otuz guruş ücret tesmiyesiyle beş ay eylediğim hizmetimin ücret-i müsemmâsından müctemi‘ yüz elli guruş ve bi-şartü’r-rücû‘ emriyle yağ ve pirinç ve sebze ve sâir matbah levazımına mâlımdan harc u sarf eylediğim yetmiş sekiz guruş ve hizmetinde iken âhar kimesnelerin atiyye olmak üzere bana bahşeyledikleri meblağdan bi-tarîkı’l-emâne ceste ceste kendiye teslîm eylediğim altmış altı guruş ki min-haysü’l-mecmû‘ iki yüz doksan dört guruşun kırk guruşunu yedinden ba‘de’l-ahz bâkī zimmetinde kalan iki yüz elli dört guruşu hâlâ taleb ederim deyü ba‘de’d-da‘vâ ve’s-suâl ol dahi cevâbında beher şehr on guruş ücret tesmiyesiyle ancak dört ay müdde‘î-i mersûmu istihdâmını ikrâr ve ücret-i mezkûreden müctemi‘ kırk guruşa takāsan müdde‘î-i mersûmun kabzını mukırr u mu‘terif olduğu kırk guruş teslîminde müdde‘î-i mesfûru tasdîk ziyâde müdde‘âsını külliyyen ba‘de’l-inkâr müdde‘î-i mersûm Bedros zimmî ber-vech-i muharrer ziyâde müdde‘âsına ikāmet-i beyyineye kādir olmayıp talebiyle mersûm Nasrala nehc-i şer‘î üzere bi’l-muvâcehe tahlîf olunmağın mûcebince müdde‘î-i mersûm Bedros zimmî ziyâde da‘vâsıyla mesfûr Nasrala’ya bilâ-beyyine bî-vech-i şer‘î mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 16 Receb sene [1]221.