Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 261 Hüküm no: 372 Orijinal metin no: [35b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorolona v. Marko’nun kira ücretinden Margarita bt. Corci’den elli guruş alacağı olduğu Galata hâricinde Kalafatçı Yunus Ağa Mahallesi’nde mütemekkin Yorolona v. Marko Galata Mahkemesi’nde meclis-i şer‘de şahsı mu‘arrefe Margarita bt. Corci Nasrâniye muvâcehesinde mersûme Margarita Nasrâniye mahalle-i mezbûrede vâki‘ taht-ı icâremde olan bir kıt‘a menzilin bir odasında beher şehr yirmi sekiz guruş icâre ile müstecirim olup icâre-i mezkûreden târih-i i‘lâm şehri gurresine gelince zimmetinde iki ayda müctemi‘ olan elli altı guruşun altı guruşunu bundan akdem yedinden ba‘de’l-ahz bâkī kalan elli guruşu hâlâ taleb ederim deyü da‘vâ eyledikde ol dahi ber-vech-i muharrer ikrâr lâkin zimmetimde deynim olan meblağ-ı mezkûr elli guruşu mersûm Yorolona’nın bi-şartü’r-rücû‘ emriyle hizmetkârı olan gāibe ani’l-meclis Kadenko Nasrâniye’ye mâlımdan bey‘ ve teslîm eylediğim eşyâ-i ma‘lûme semeninden alacağım olan guruşa emr-i mezkûruna binâen bi’l-mürâca‘a takās ve mahsûb ederim deyü [36a] eylediği da‘vâsını mersûm Yorolona ba‘de’l-inkâr Nasrâniye-i mersûme Margarita da‘vâ-yı mezkûresini beyândan izhâr-ı acz edip bi’t-taleb mersûm Yorolona ba‘de’t-tahlîfü’ş-şer‘î Nasrâniye-i mersûme da‘vâ-yı mezkûresiyle mesfûr Yorolona bilâ-beyyine mu‘ârazadan ba‘de’l-men‘ Nasrâniye-i mersûmenin ikrârı mûcebince lâzım gelen meblağ-ı bâkī-i mezkûr elli guruşu müdde‘î-i mersûm Yorolona’ya edâya mersûme Margarita Nasrâniye’ye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 10 Receb sene [1]221.