Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 262 Hüküm no: 374 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Murad Beşe’nin sattığı gulâm bedelinden Tâcir İbrahim b. Mehmed’den üç yüz guruş alacağı olduğu Sâhib-i arzuhâl Esirci Murad Beşe b. Süleyman Galata Bâb Mahkemesi’nde meclis-i şer‘de tüccârdan derûn-ı arzuhâlde mezkûrü’l-ism İbrahim b. Mehmed muvâcehesinde mezbûr İbrahim bundan akdem yedimden ve mâlımdan iştirâ ve kabz eylediği on iki yaşında Çerkesiyyü’l-asl ma‘lûmü’l-evsâf bir re’s gulâm semeninden iki bin beş yüz guruşdan bâkī bin üç yüz guruş alacak hakkım olmağla hâlâ taleb ederim deyü da‘vâ eylediğimde ol dahi külliyyen ba‘de’l-inkâr bu vechile beynimizde ba‘de vukū‘ı’l-münâza‘a ve bâ-vesâtet-i muslihîn ben tasaddî eylediğim da‘vâmdan mezbûr İbrahim ile üç yüz guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ bin guruşa müte‘allika da‘vâdan mezbûr İbrahim’in zimmetini ba‘de’l-ibrâ ibrâdan müstesnâ bedel-i sulh-ı mezkûr üç yüz guruş mezbûr İbrahim’in zimmetinde kalmağla hâlâ taleb ederim deyü da‘vâ eylediğimde ol dahi ber-vech-i muharrer ikrâr u i‘tirâf etmeğin alâ-mûcibi ikrârihi bedel-i sulh-ı mezkûr üç yüz guruşu mezbûr Murad Beşe’ye edâsıyla mezbûr İbrahim ilzâm olunduğu bi’l-iltimâs [huzûr-ı âlîlerine i‘lâm olundu.] Fî 22 Receb sene [1]221.