Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 262 Hüküm no: 375 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi bt. Agop’un kira ücretinden Rusyalı Vasil v. Filibo’dan altmış beş guruş alacağı olduğu Galata’da Sultan Bayezid Mahallesi’nde mütemekkine şahsı mu‘arrefe Takohi bt. Agop Nasrâniye meclis-i şer‘-i şerîf-i enverde Rusyalu Vasil v. Filibo nâm müste’men muvâcehesinde tercümânı tarafından Yasakçı İsmail hâzır olduğu hâlde mersûm Vasil mahalle-i mezkûrede vâki‘ mutasarrıfe olduğum bir bâb menzilimin iki bâb odasında beher şehr yirmi beşer guruş icâre ile müstecirim olup icâre-i mezkûreden târih-i i‘lâma gelince üç ayda zimmetinde müctemi‘a olan yetmiş beş guruşun on guruşunu mersûm Vasil’e zimmetimde kömür semeninden deynim olan on guruşa bi’t-terâzî ba‘de’t-takās ve’l-mahsûb bâkī kalan altmış beş guruşu mersûm Vasil’den taleb ederim deyü da‘vâ eyledikde ol dahi ikrâr lâkin meblağ-ı bâkī-i mezkûr altmış beş guruşun elli guruşu dahi müdde‘iye-i mersûme Takohi Nasrâniye’ye edâ ve teslîm etmişidim bâkī zimmetimde on beş guruş deynim kalmışdır deyü mikdâr-ı mezkûrda eylediği def‘ine ikāmet-i beyyine edemeyip bi’t-taleb müdde‘iye-i mersûme Takohi Nasrâniye ba‘de’t-tahlîfü’ş-şer‘î mûcebince meblağ-ı bâkī-i mezkûr altmış beş guruşu müdde‘iye-i mersûme Takohi Nasrâniye’ye edâ ve teslîme müste’men-i mersûm Vasil’e tenbîh olunduğu bi’l-iltimâs [huzûr-ı âlîlerine i‘lâm olundu.] Fî 26 Receb sene [1]221.