Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 273 Hüküm no: 396 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Kostantin’in babasının terekesinden sakladığını iddia ettiği üç bin sekiz yüz otuz yedi guruştan kendi hissesine isabet eden miktarı vermesi talebiyle vasisi ve dayısı Bakkāl Yani v. Rika aleyhine açtığı davada dört yüz guruşa sulh olduğu Mahrûse-i Galata’ya muzâfe kasaba-i Fındıklı’da Kazgancıbaşı Mahallesi’nde bakkāl iken bundan akdem hâlik olan Kostantin v. Yani zimmînin verâseti zevcesi Hayek bt. Rika ile sulbî kebîr oğlu Yorgi ve sulbiye kızları Vaskile ve Kostantıniyye’ye ba‘de’l-inhisâr verese-i mersûmûndan arzuhâl eden mersûm Yorgi zimmî Çarşamba günü Dîvân-ı âlîde ba‘dehû mahrûse-i mezbûre mahkemesinde ma‘kūd meclis-i şer‘-i münîrde dayısı ve hâl-i sıgārında kıbel-i şer‘den mansûb bâ-hüccet vasîsi olan derûn-ı arzuhâlde mersûmü’l-ism bakkāl esnâfından Yani v. el-mersûm Rika zimmî muvâcehesinde babam hâlik-i mersûm Kostantin zimmînin hîn-i helâkinde ben sagīr ve kız karındaşlarım mesfûretân sagīre olduğumuz ecilden min-kıbeli’l-üm ceddimiz olan babası mersûm Rika zimmî bâ-hüccet vasiyy-i mansûbumuz olduğu ecilen ber-mantûk-ı defter-i kassâm babam hâlik-i mersûmun terekesine bi’l-vesâye vâzı‘u’l-yed iken ol dahi hâlik oldukda oğlu dayım mersûm Bakkāl Yani zimmî kezâlik bâ-hüccet kıbel-i şer‘den mansûb vasîmiz olmağın ol vechile vasiyy-i sânî-i mesfûr babam hâlik-i mersûmun terekesinden bi’l-vesâye vaz‘-ı yed eylediği nukūd ve urûz ve akārda gerek babası ceddimiz vasiyy-i evvelin makbûzâtından hücec-i şer‘iyye mantûklarınca babam hâlik-i evvel-i mersûmun sâbit düyûn-ı kesîresini edâ için ma‘rifet-i şer‘le bi’l-vesâye medfû‘âtları ve nafakamıza ve mesârif-i sâiremize masrûfâtları lede’l-muhâsebe makbûlümüz olup lâkin vasiyy-i sânî-i mersûm Bakkāl Yani zimmî hâric ez-defter-i kassâm-ı mezkûr babam hâlik-i mersûmun terekesinden âhara bey‘ eylediği eşyâ-i ma‘lûme semenlerinden bin dört yüz elli dört guruşu ve zimemden tahsîl eylediği sekiz yüz guruşu ve dükkân icârelerinden ve sermâyeden bin beş yüz seksen üç guruş ki cem‘an üç bin sekiz yüz otuz yedi guruşu bi’l-vesâye kabz ve ketm ve ihfâ etmekle meblağ-ı mecmû‘-ı mezkûr üç bin sekiz yüz otuz yedi guruşdan hisse-i irsiyyemi taleb ederim deyü bi’l-verâse da‘vâ eylediğimde ol dahi zikrolunan defter-i kassâm nâtık olduğu üzere vesâyet-i mezkûreyi ikrâr mâ‘adâ üç bin sekiz yüz otuz yedi guruş müdde‘âmı külliyyen inkâr-birle beynimizde ba‘de vukū‘ı’l-münâza‘a ve bâ-vesâtet-i muslihîn ben tasaddî eylediğim da‘vâ-yı mezkûremden dayım vasiyy-i sânî-i mersûm Bakkāl Yani zimmî ile def‘an li’n-nizâ‘ an-inkâr dört yüz guruş bedel-i medfû‘-ı makbûza sulh olduğumda ol dahi ber-vech-i muharrer sulh-ı mezkûru ba‘de’l-kabûl ben mâ‘adâ üç bin sekiz yüz otuz yedi guruşdan hisse-i irsiyye mütâlebesine ve târih-i i‘lâma gelince hîn-i vesâyetlerinde makbûz ve mesâriflerine ve babam hâlik-i mersûmun deyni için ma‘rifet-i şer‘le bi’l-vesâye âhara bey‘ olunan urûz ve akārdan gabn-i fâhiş da‘vâsıyla ziyâde semen mütâlebesine ve bi’l-cümle husûs-ı mezkûra ve ba‘de’l-bülûğ beynimizde cereyân eden hukūk-ı sâire-i şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan ceddim vasiyy-i evvel-i mersûm Rika zimmînin vereseleriyle oğlu dayım vasiyy-i sânî-i merkūm Bakkāl Yani zimmînin zimmetlerini şürût-ı müfsideden ârî ibrâ-yı âmm-ı sahîh-i şer‘î ile bi’l-verâse ibrâ ve iskāt eylediğimde ol dahi ber-vech-i muharrer ibrâmı kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve mübâşirleri Abdülkerim Çavuş kulları yediyle huzûr-ı âlîlerine i‘lâm olundu. Fî 25 Receb sene [1]221.