Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 275 Hüküm no: 399 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Diyon tarafından ortak tasarruflarında olan şerbethaneden Şerbetçi Sekyas’ın çıkarılmayıp Sekyas’ın kendi mülkü olan alet ve edevatına da müdahale edilmemesine karar verildiği Sâhib-i arzuhâl şerbetçi esnâfından Sekyas v. İsayi nâm zimmî Galata’da mahfil-i kazâda esnâf-ı merkūmeden derûn-ı arzuhâlde mezkûrü’l-ism Diyon v. Karabet nâm zimmî muvâcehesinde cennet-mekân firdevs-âşiyân merhûm ve mağfûrun-leh Sultan Ahmed Hân -tâbe serâhu- evkāfından olan Galata Mukāta‘ası müstegallâtından Galata’da vâki‘ şerbetçi esnâfının ustabaşıları Aslan ve esenn ü ihtiyâr ustalarından Zibo ve İlya ve Marko ve Andon ve Ananoş ve Yo[r]go ve Aci Artin ve Artin ve sâir ustalar ile Galata hâricinde Beyoğlu ve Santa Marka ve Ketehorya’da kâin şerbetçi esnâfının ustabaşıları Marko ve esenn ü ihtiyâr ustalarından Arpiri ve Yanako ve İstavri ve Panago ve Sahak ve Kigork ve diğer Marko ve sâirleri hâzır olduğu hâlde takrîr-i kelâm ve tâ‘bir ani’l-merâm edip sâlifü’l-beyân Beyoğlu’nda Kamer Hatun Mahallesi’nde vâki‘ ma‘lûmü’l-hudûd ve’l-müştemilât bir bâb vakıf menzil ile menzil-i merkūm tahtında kâin bir kıt‘a vakıf şerbethâne işbu yedimizde olup meclis-i şer‘de rü’yet olunan mütevellî temessükleri mantûklarınca mersûm Diyon zimmî ile bi’l-münâsafa benim taht-ı tasarrufumuzda olup lâkin şerbethâne-i mezkûre derûnunda mevcûde beyne’l-esnâf şerbetçi âlât-ı lâzımesi olan bir destgâh ve elli iskemle ve on sofra ve elli tabak ve beş tencere ve üç tâbe ve beş lenger ve ber-mûceb-i defter sâir âlât-ı lâzıme-i ma‘lûme gālî bahâ ile âhardan iştirâ olunmuş müstakillen benim yedimde mâlım olmağla mersûm Diyon zimmînin ancak şerbethâne-i merkūmede mutasarrıf olduğu nısf hissesine beher şehr beş guruş ücret ta‘yîniyle li-eb? ve mülküm [olup] kadîmden beri mütemekkin ve derûnunda şerbetçilik edegelmişiken mersûm Diyon zimmî ber-vech-i muharrer müstakillen mâlik olduğum âlât-ı lâzımemi tasarrufdan beni men‘ ve şerbethâne-i merkūmeden beni ihrâca tasaddî etmekle suâl olunup âlât-ı merkūma müdâhale etmemek üzere mersûm Diyon zimmîye tenbîh olunmak murâdımdır deyü ba‘de’d-da‘vâ ve’s-suâl mersûm Diyon zimmî dahi cevâbında hâl bi’l-cümle bâlâda bast u beyân olunan minvâl üzere olduğunu bi-tamâmihî tâyi‘an ve kat‘iyyen ikrâr u i‘tirâf eyledikden sonra âlât-ı merkūme ber-vech-i muharrer mersûm Sekyas zimmînin müstakillen mâlı olduğunu esnâf-ı merkūme dahi bi-ecmâ‘ihim haber vermeleriyle mûcebince şerbethâne-i merkūmeden mersûm Sekyas zimmîyi ihrâc dâ‘iyyesiyle müstakillen mâlik olduğu âlât-ı mezkûresiyle ta‘arruz ve müdâhale etmemek üzere mersûm Diyon zimmîye tenbîh olunduğu huzûr-ı âlîlerine i‘lâm olundu. Fî 11 Şa‘bân sene 1221.