Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 277 Hüküm no: 401 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Seyyid Musa’nın emanetten Seyyid Mustafa’dan altmış beş guruş alacağı olduğu Tütüncü esnâfından es-Seyyid Musa b. Feyzullah Galata Bâb Mahkemesi’nde meclis-i şer‘de yine esnâf-ı mezbûreden es-Seyyid Mustafa b. Osman muvâcehesinde mezbûr es-Seyyid Mustafa’nın damadı işbu hâzır bi’l-meclis Ali Ağa’ya cihet-i deyn-i şer‘îden altmış beş guruş deynim olup meblağ-ı mezbûru damadın mezbûra ver deyü mâlımdan mezbûr es-Seyyid Mustafa’ya altmış beş guruş def‘ u teslîm ol dahi ba‘de’l-ahz damadı hâzır-ı mezbûra vermeyip yedinde kalmağla hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan es-Seyyid Mustafa b. es-Seyyid Mehmed ve Abdullah Alemdâr b. el-Hâc Abdullah şehâdetleriyle mezbûr es-Seyyid Mustafa muvâcehesinde vech-i şer‘î üzere isbât etmeğin mûcebince meblağ-ı mezkûr altmış beş guruşu müdde‘î-i mezbûr es-Seyyid Musa’ya redd ü teslîme mezbûr es-Seyyid Mustafa’ya tenbîh olunduğu huzûr-ı alîlerine i‘lâm olundu. Fî 10 Şa‘bân sene [1]221.