Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 277 Hüküm no: 402 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Bedros’un kereste bedelinden alacağı olan bin yüz guruşu taksitle ödemesi için Fransalı Yahûdi Danyel’e izin verdiği Mahrûse-i Galata muzâfâtından Beşiktaş kasabasına tâbi‘ Ortaköy’de mütemekkin keresteci esnâfından Bedros v. Sinan nâm zimmî mahrûse-i mezbûrede mahfil-i kazâda Françelü Danyel v. Mosi nâm müste’men Yahûdi muvâcehesinde Françe tercümânlarından Patos hâzır olduğu hâlde mersûm Danyel bundan akdem mâlımdan ve yedimden iştirâ ve kabz eylediği kereste-i mütenevvi‘a-yı ma‘lûme semeninden ba‘de külli’l-hesâb zimmetinde üç bin beş yüz üç guruş alacak hakkımın iki bin dört yüz üç guruşunu ceste ceste bana teslîm ben dahi ahz u kabz edip bâkī kalan bin yüz guruşu ber-vech-i âtî müeccelen ve mukassatan edâya tâlib olmağın meblağ-ı merkūmdan beher şehr otuzar guruş verip târih-i i‘lâmdan otuz altı ay yirmi gün tamamında îfâ ve edâ etmek üzere mersûmu rızâmla te’cîl ve taksît eyledim dedikde mersûm Danyel dahi meblağ-ı bâkī-i merkūmu ikrâr ve te’cîl-i mezkûru kabûl ve müeccelen edâya ta‘ahhüd eylediği tescîl ve bi’l-iltimâs huzûr-ı âlîlerine i‘lâm olundu. Fî 8 Ş sene 1221.