Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 843 Hüküm no: 1102 Orijinal metin no: [132b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Neslihan bt. Mehmed’in, evinin yarısını kocası Osman Çelebi b. Hasan’a sattığı ve borcuna takas ettiği Mahmiye-i İstanbul’da Keçeci Pîrî mahallesinde sâkine Neslihan bt. Mehmed nâm hâtun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan Ömer Efendi b. Ali ve Mehmed Çelebi b. Mustafa nâm kimesneler şehâdetleri ile şer‘an sâbit olan Sinan Çelebi b. Bilâl nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevci bâ‘isü’l-kitâb Osman Çelebi b. Hasan mahzarında bi’l-vekâle ikrâr ve takrîr-i kelâm edip müvekkile-i mezbûre Neslihan mahalle-i mezbûrede vâki‘ bir tarafdan benim mülküm ve bir tarafdan Mehmed Çelebi b. Ali mülkü ve iki tarafdan tarîk-i âm ile mahdûd üç bâb tahtânî oda ve bir sofa ve bir su kuyusu ve bir kenîf ve hadîkayı müştemil mülk menzilimin nısf-ı şâyi‘ini zevci merkūm Osman Çelebi’ye tarafeynden îcâb ve kabûlü hâvî bey‘ ve teslîm edip ol dahi iştirâ ve kabûl eyledikden sonra semeni olan meblağ-ı mezbûr on bin akçenin beş bin akçesini müvekkile-i mezbûre Neslihan zevci merkūm Osman Çelebi’ye cihet-i karz-ı şer‘îden olan beş bin akçe deynine takās eyledikde ol dahi mukāssa ve kabûl edip bâkī beş bin akçeden merkūm Osman Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi, ba‘de’l-yevm menzil-i mahdûd-ı mezkûrun nısf-ı şâyi‘i merkūm Osman Çelebi’nin mülk-i müşterâsıdır keyfe mâ yeşâ’ ve yahtâr tasarruf eylesin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Beşe b. Ahmed, Mustafa Çelebi b. Ahmed, Abdullah b. Mehmed, Abdullah b. Ahmed, Mehmed Çelebi b. Mustafa, Abdülganî el-Müezzin.