Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 280 Hüküm no: 409 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mustafa Beşe’nin karısı Şerife Fâtıma aleyhine açtığı itâatsizlik davasında davalının kocasına itâat etmesine karar verildiği Havâss-ı refi‘a kazâsına muzâfe Ayazağa karyesinde sâkin Sâdabâd bostancılarından Mustafa Beşe b. Mehmed nâm kimesne Galata’da mahfil-i kazâda zevce-i medhûlün-bihâsı mu‘arrefetü’z-zât Şerife Fâtıma bt. el-Hâc Mustafa nâm hatun muvâcehesinde mezbûr Şerife Fâtıma Hatun yüz elli guruş mehr-i müeccel tesmiyesiyle zevce-i medhûlün-bihâm olup mehr-i mu‘accelini kendiye îfâ etmeğin bana itâ‘at ve inkıyâda zevcem mezbûreye tenbîh olunmak matlûbumdur dedikde ol dahi cevâbında müdde‘î-i mezbûr Mustafa Beşe’nin on yedi seneden beri zevce-i medhûlün-bihâsı olduğunu ikrâr lâkin zevcim mezbûr beni bi-gayr-ı hak darb ve tekdîr eder deyü teşekkî eyledikde mezbûr Mustafa Beşe ba‘de’l-yevm zevcesi mezbûreyi bi-gayr-ı hak darb ve tekdîr etmemek üzere ta‘ahhüd ve hîn-i mütâlebede meclis-i şer‘a ihzârına zâbiti ma‘rifetiyle kefîle rabt olundukdan sonra zevci müdde‘î-i mezbûr Mustafa Beşe’ye itâ‘at ve inkıyada zevcesi mezbûre Şerife Fâtıma Hatun’a tenbîh olunduğu bi’[l]-iltimâs [huzûr-ı âlîlerine i‘lâm olundu.] Fî 29 Receb sene 1221.