Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 283 Hüküm no: 416 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Ali Çelebi’nin kaşkaval peyniri bedelinden Bakkāl Nikola aleyhine açtığı alacak davasında altmış bir guruşa sulh olduğu Tüccârdan Ali Çelebi b. Hüseyin nâm kimesne Galata Bâb Mahkemesi’nde meclis-i şer‘de Bakkāl Nikola v. Ligor zimmî muvâcehesinde mersûm Nikola zimmî zimmetinde kıyye ve fiyatı beynimizde ma‘lûm kaşkaval peyniri semeninden yetmiş bir guruş otuz para alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Nikola zimmî ile altmış bir guruşa ba‘de’s-sulh ve’l-kabûl mâ‘adâ on guruş otuz paraya müte‘allika da‘vâdan mersûm Nikola zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm altmış guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i merkūm altmış guruşun müdde‘î-i mezbûr Ali Çelebi’ye edâsıyla mersûm Nikola zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 16 Ş sene 1221.