Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 284 Hüküm no: 417 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Memiş Beşe’nin harnup ticaretindeki ortaklıklarından Kalyoncu Osman Çavuş aleyhine açtığı alacak davasında yüz on dört guruşa sulh olduğu Kasab Memiş Beşe b. İbrahim nâm kimesne Galata Bâb Mahkemesi’nde meclis-i şer‘de tüccârdan Kalyoncu Osman Çavuş b. Hüseyin nâm kimesne muvâcehesinde ben bundan akdem “âhara bey‘ ve semenini ba‘de’l-kabz i‘mâl eyle her ne fâide hâsıl olursa nısfı senin ve nısf-ı âharı benim olsun” deyü mâlımdan yedi yüz on bir guruş kıymetli yüz elli kantar harnubumu mezbûr Osman Çavuş’un yedine def‘ u teslîm ol dahi ba‘de’l-ahz ve’l-bey‘ meblağ-ı mezkûru i‘mâl eyledikden sonra yüz elli guruş fâide-i hâsıla zuhûr eyledikden sonra re’s-i mâlımdan olan yedi yüz on bir guruşun beş yüz doksan yedi guruşunu bana def‘ u teslîm bâkī yüz on dört guruşun ve fâide-i hâsıladan nısf hisseme isâbet eden yetmiş beş guruş ki cem‘an yüz seksen dokuz guruşu bana vermeyip yedinde kalmağla hâlâ taleb ederim deyü tasaddî eylediği da‘vâsından bâ-tavassut-ı muslihîn mezbûr Osman Çavuş ile yüz on dört guruşa ba‘de’s-sulh ve’l-kabûl mâ‘adâ yetmiş beş guruşa müte‘allika da‘vâdan mezbûr Osman Çavuş’un zimmetini ba‘de’l-ibrâ ve’l-kabûl mûcebince bedel-i sulh-ı mezkûr yüz on dört guruşu müdde‘î-i mezbûr Memiş Beşe’ye edâsıyla mezbûr Osman Çavuş ilzâm olunduğu huzûr-ı âlîlerine i‘lâm olundu. Fî 17 Ş sene 1221.