Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 285 Hüküm no: 419 Orijinal metin no: [40b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Yakub Ağa‘nın kereste bedelinden alacağı olduğu iddiasıyla Hafize Hatun aleyhine açtığı davada yüz elli guruşa sulh olduğu Topçu çorbacılarından elli altı cemâ‘atin çorbacısı sâhib-i arzuhâl Ya‘kub Ağa b. Ahmed nâm kimesne Galata’da mahfil-i kazâda mahrûse-i Galata’ya muzâfe kasaba-i Tophane’de Çavuşbaşı nâm mahalde vâki‘ bir kıt‘a kahve dükkânımın mutasarrıfesi derûn-ı arzuhâlde mezkûretü’l-ism zâtı mu‘arrefe Hafize bt. Halil nâm hatun muvâcehesinde mezbûre Hafize Hatun’un zevcesi Haffâf Hasan b. Ahmed ile oğlu Mehmed Ârif hâzır oldukları hâlde mezbûre Hafize Hatun bundan akdem mutasarrıfe olduğu dükkân-ı merkūmu ta‘mîr ve tecdîd için yedimden iştirâ ve kabz ve dükkân-ı merkūmun iktizâ eden mahalline harc u sarf eylediği kereste-i mütenevvi‘a-yı ma‘lûme semeninden dört yüz on sekiz guruş alacak hakkım olmağla hâlâ taleb ederim deyü tasaddî eylediği da‘vâsından bâ-tavassut-ı muslihin an-inkâr mezbûre Hafize Hatun ile yüz elli guruş bedel-i medfû‘ ve makbûza ba‘de’s-sulh ve’l-kabûl mâ‘adâ iki yüz altmış sekiz guruşa ve târih-i i‘lâma gelince bi’l-cümle hukūk-ı sâire-i şer‘iyyeye müte‘allika âmme-i da‘vâdan mezbûre Hafize Hatun ile hâzırân-ı mezbûrânın zimmetlerini ibrâ ve iskāt eyledikde onlar dahi ber-vech-i muharrer ibrâsını kabûl-birle kat‘-ı münâza‘a eyledikleri tescîl bi’[l]-iltimâs [huzûr-ı âlîlerine i‘lâm olundu.] Fî 15 Şa‘bân sene 1221.