Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 286 Hüküm no: 421 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Mustafa’nın elinde bulunan torunu Şerife Hadice Hatun’a ait eşyaları teslim etmesine karar verildiği Şahkulu Mahallesi’nde sâkine Şerife Hadice bt. Mustafa b. Abdullah’ın zevci ve tarafından husûs-ı âtîde vekîl olduğu zâtını ârifân es-Seyyid Mustafa Ağa [b.] Ahmed ve es-Seyyid Mehmed Tahir Çelebi b. Abdullah nâm kimesneler şehâdetleriyle sâbit olan es-Seyyid Hasan Beşe b. Mehmed nâm kimesne Galata’da mahfil-i kazâda müvekkile-i mezbûrenin ceddesi zâtı mu‘arrefe Neslihan bt. Mustafa nâm hatun muvâcehesinde müvekkilem zevcem mezbûre Şerife Hadice Hatun’un eşyâ-i memlûkesinden yün memlû iki minder ve kıtık memlû dört çatma yasdık ve bir çit döşek ma‘a çârşeb ve iki çit mak‘ad ve bir çit yorgan ve bir baş yasdığı ve bir tahta yayıcı ve bir ayna ve iki sahan bâ-kapak ve bir tas ve bir tencere bâ-kapak ve bir tâbe ve bir şem‘dân ve bir iskemle mezbûre Neslihan Hatun’un yedinde hâlâ mevcûde olmağla müvekkilem zevcem mezbûre için bi-a‘yânihâ bana teslîme mezbûre Neslihan Hatun’a tenbîh olunmak bi’l-vekâle matlûbumdur deyü da‘vâ eyledikde ol dahi cevâbında eşyâ-i muharrere-i mezkûre müvekkile-i mezbûrenin mâlı olup yedinde hâlâ mevcûde olduğu bi-tamâmihâ ihbâr etmeğin mûcebince eşyâ-i muharrere-i mezkûreyi müvekkile-i mezbûre için zevci vekîl-i mezbûr es-Seyyid Hasan Beşe’ye bi-a‘yânihâ teslime mezbûre Neslihan Hatun’a tenbîh olunduğu bi’[l]-iltimâs huzûr-ı âlîlerine i‘lâm olundu. Fî 15 Ş sene 1221.