Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 287 Hüküm no: 425 Orijinal metin no: [41a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefîse bt. Abdullah’ın saat bedelinden alacağı olduğu iddiasıyla Yemenici Abdullah Beşe aleyhine açtığı davada seksen guruşa sulh olduğu Medîne-i Üsküdar’da Yeniçeşme nâm mahalde sâkine zâtı mu‘arrefe Nefîse bt. Abdullah nâm hatun Galata Bâb Mahkemesi’nde meclis-i şer‘de Galata’ya muzâfe kasaba-i Tophane’de sâkin Yemenici Abdullah Beşe b. Hasan nâm kimesne muvâcehesinde mezbûre Nefîse Hatun’un zevci Hâfız Ali b. Mehmed hâzır olduğu hâlde mezbûr Abdullah Beşe yedimden iştirâ ve kabz eylediği bir hilâlî sa‘at semeninden yüz guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Abdullah Beşe ile seksen guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ yirmi guruşa müte‘allika da‘vâdan mezbûr Abdullah Beşe’nin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı mezkûr seksen guruş mezbûr Abullah Beşe’nin zimmetinde kalmağla hâlâ taleb ederim deyü ba‘de’d-da‘vâ ve’l-ikrâr mûcebince bedel-i sulh-ı mezkûr seksen guruşu müdde‘iye-i mezbûre Nefîse Hatun’a edâsıyla mezbûr Abdullah Beşe ilzâm olunduğu bi’[l]-iltimâs huzûr-ı âlîlerine i‘lâm olundu. Fî 10 Şa‘bân sene 1221.