Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 846 Hüküm no: 1107 Orijinal metin no: [133a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârislerin, Mustafa b. Receb’in terekesini beytülmâl emîni el-Hâc Ahmed Ağa b. Hüdâverdi’den aldıkları Fi’l-asl vilâyet-i Anadolu’da Yalvaç kazâsına tâbi‘ Manarga nâm karye ahâlîsinden olup mahrûse-i Üsküdar’da vâki‘ Hadîka-i sultâniye bostancılarından iken bundan akdem medîne-i Edirne’de vefât eden Mustafa b. Receb’in hasren vârisleri olan li ebeveyn ammi Hamza b. Süleyman nâm kimesne asâleten ve müteveffâ-yı mezbûrun vâlidesi Hânende bt. Osman ile li ebeveyn kız karındaşları Fâtıma bt. ( ) ve Râziye ve Emine ve Havva nâm hâtunlar taraflarından husûs-ı âti’l-beyâna vekîl olduğu Hasan b. Musli ve Veli b. Davud nâm kimesneler şehâdetleri ile şer‘an sâbit olan Abdünnebi b. Davud nâm kimesneler meclis-i şer‘de hâlâ bostancılar kethüdâsı ve beytülmâli kabza memûr olmağla müteveffâ-yı mezbûrun vârisi olmamak zu‘mu ile terekesini beytülmâl için kabz eden bâ‘isü’l-kitâb fahrü’l-emâsil ve’l-eşbâh el-Hâc Ahmed Ağa b. Hüdâverdi tarafından husûs-ı âti’l-beyâna vekîl olduğu bimâ hüve nehcü’s-sübût şer‘an sâbit olan Ahmed Bey b. Halil nâm kimesne mahzarında ikrâr ve takrîr-i kelâm edip müteveffâ-yı mezbûrun mecmû‘-ı terekesi olan yirmi üç bin üç yüz akçeyi müvekkil-i mezbûr Ahmed Ağa yedinden tamâmen ahz u kabz eyledik min ba‘d yedinde bir nesne bâkī kalmayıp husûs-ı mezbûra müte‘allika da‘vâmız dahi yokdur dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdülmennân, İbrahim Çelebi b. Ahmed, Hüseyin Çelebi b. Ahmed, Resul [b.] Rıdvan, Hüseyin b. Mustafa, Gazanfer b. Tevekkül, Ali b. Mustafa.