Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 847 Hüküm no: 1108 Orijinal metin no: [133a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toros’un, babasından kaldığını iddia ettiği arsanın babası tarafından Vartan v. Ohan’a satıldığının tespit edildiği Mahmiye-i İstanbul’da Kâtib Kasım mahallesinde mütemekkin iken bundan akdem hâlik olan Karagöz v. Karagöz v. Kazar nâm Ermeni’nin sulbî kebîr oğlu ve hasren vârisi olan Toros nâm Ermeni meclis-i şer‘-i hatîr-i lâzımü’t-tevkīrde zikri âtî menzile vâzı‘ü’l-yed olan bâ‘isü’s-sifr Vartan v. Ohan nâm Ermeni muvâcehesinde üzerine da‘vâ ve takrîr-i kelâm edip babam hâlik-i merkūm Karagöz’ün terekesinden olup bi’l-irsi’ş-şer‘î bana intikāl eden mahalle-i mezbûrda vâki‘ bir tarafdan Agop mülkü ve bir tarafdan Tülbentçi Bünyad mülkü ve bir tarafdan kendi âhar mülküm ve bir tarafdan tarîk-i âm ile mahdûd kuyudan yola varınca tûlen sekiz ve arzen yirmi bi hesâb-ı terbî‘î yüz altmış zirâ‘ olup müşterek yol ve müşterek su kuyusunu müştemil mülk menzil arsası üzerine mezbûr Vartan fuzûlen binâ ihdâs edip tasarruf eder, suâl olunup mûceb-i şer‘îsi icrâ olunmak matlûbumdur dedikde gıbbe’s-suâl mezkûr Vartan cevâbında zikri mürûr eden arsa-i mahdûde-i mezkûreyi hâlik-i merkūm bin yetmiş dört senesi Ramazânı’nın sekizinci gününde hâl-i hayâtında yirmi yedi bin üç yüz akçe semen-i makbûza bana bey‘-i kat‘î ile bey‘ ve teslîm ben dahi vech-i meşrûh üzre iştirâ ve tesellüm ve kabûl edip hattâ târih-i mezkûrda Mahmud Paşa mahkemesi’nde nâibü’ş-şer‘ olan fahrü’l-müderrisîni’l-kirâm Ali Efendi [b.] Derviş Mehmed huzûrunda arsa-i mahdûde-i mezbûreyi merkūm Karagöz vech-i muharrer üzre semen-i mezbûr yirmi yedi bin üç yüz akçeye bana bey‘ ve teslîm ve kabz-ı semen ettiğini ikrâr edip mûcebince mûmâ-ileyh Ali Efendi yedime hüccet-i şer‘iyye dahi vermişidi deyû mazmûnu takrîr-i meşrûhunu nâtık ve mûmâ-ileyh Ali Efendi’nin hat ve hatmini hâviye ve târih-i mezbûr ile müverraha hüccet-i şer‘iyye ibrâz edip müdde‘î-i mezbûr Toros muvâcehesinde feth ve kırâat ve istintâk olundukda merkūm Toros bi’l-külliye inkâr edicek mahalle-i mezbûre sükkânından olup zeyl-i hüccet-i merkūmda isimleri mastûr olan İsmail b. Ali nâm kimesne ile Kutlu v. Kablan ve Asvador v. Ahican nâm Ermeniler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müdde‘î-i mezbûr Toros’un babası hâlik-i merkūm Karagöz hâl-i hayâtında târih-i mezbûrda zikr olunan Mahmud Paşa mahkemesi’nde nâibü’ş-şer‘ olan mûmâ-ileyh Ali Efendi huzûrunda mülküm olan arsa-i mahdûde-i mezbûreyi merkūm Vartan’a yirmi yedi bin üç yüz akçeye bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru merkūm Vartan yedinden tamâmen ahz u kabz eyledim deyû ikrâr edip mûmâ-ileyh Ali Efendi dahi mezbûrun ikrârını tahrîr ve mûcebince mezbûrun yedine işbu hüccet-i şer‘iyyeyi vermişidi, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Toros bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: El-Hâc Ömer b. Abdullah, Abdullah Efendi [b.] Üveys, Himmet b. Mehmed, İsmail b. Ali, Hacı Mustafa b. Osman.