Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 308 Hüküm no: 473 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Ağa’nın koyun bedelinden alacağı olduğu iddiasıyla Mustafa Reis aleyhine açtığı davada yüz guruşa sulh olduğu Galata’ya muzâfe kasaba-i Fındıklı’da Molla Çelebi Mahallesi’nde sâkin silâhşor-ı hazret-i şehriyârî el-Hâc Ahmed Ağa b. Abdullah nâm kimesne Galata Bâb Mahkemesi’nde meclis-i şer‘de sefîne reislerinden Mustafa Reis b. Ahmed nâm kimesne muvâcehesinde ben târih-i i‘lâmdan dört sene mukaddem Âsitâne-i aliyye’den Mihaliç İskelesi’ne ücret-i ma‘lûme ile nakl için râkib olduğu sefînesine mâlımdan vaz‘ ve tahmîl eylediğim ma‘lûmü’l-aded ağnâmımın elli dört re’s ağnâmımı te‘addîsiyle istihlâk etmekle kıymetleri olan cem‘an iki yüz yetmiş guruşu reis-i mezbûrdan tazmîn taleb ederim deyü da‘vâ eylediğimde ol dahi cevâbında zikrolunan elli dört re’s ağnâmı bilâ-ta‘add[î] helâk olduğunu ikrâr [ve] te‘addîsini inkâr-birle beynimizde ba‘de vukū‘ı’l-münâza‘a ve bâ-vesâtet-i muslihîn ben tasaddî eylediğim da‘vâ-yı mezkûremden mezbûr Mustafa Reis ile yüz guruş bedel-i makbûza ba‘de’s-sulh ve’l-kabûl mâ‘adâ yüz yetmiş guruşu ve bedel-i sulh-ı merkūma müte‘allika da‘vâdan herbirimiz âharın zimmetini ibrâ ve iskāt eyleyip ve herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl bi’[l]-iltimâs huzûr-ı âlîlerine i‘lâm olundu. Fî 10 L sene 1221.