Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 312 Hüküm no: 480 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emekyemez Mahallesi ahalisinin talebi üzerine uygunsuz hareketlerde bulunan Hadice, oğlu Demirci Mehmed, Mehmed’in hanımları Zenciye Ayşe ve Fâtıma ve üvey oğlu Mehmed’in hanımı Ayşe’nin mahalleden çıkarıldıkları Kaydı ihrâc şüd Ashâb-ı arzuhâl mahrûse-i Galata’da Emekyemez Mahallesi imâmı Hâfız es-Seyyid Mustafa Efendi ve müezzini Hâfız Mehmed Emin Efendi ve ahâlîsinden el-Hâc Mehmed Efendi ve Mustafa Ağa ve el-Hâc Mehmed Ağa ve diğer Mustafa Ağa ve Kalafatçı Mehmed Ağa ve İsmail Ağa ve Derzi el-Hâc Ahmed Beşe ve Molla İsmail ve Berber Mehmed Beşe ve es-Seyyid Mehmed Ârif Çelebi ve diğer Mustafa Ağa ve es-Seyyid İbrahim Edhem Çelebi ve Ahmed Ağa ve es-Seyyid Ahmed Ağa ve es-Seyyid İbrahim Çelebi ve sâir mazbûtü’l-esâmî kırk neferden mütecâviz kimesneler Galata’da mahfil-i kazâda mahalle-i mezkûre ahâlîlerinden derûn-ı arzuhâlde isimleri mezkûre ve zâtları mu‘arrefe ve Demirci zevcesi demekle arîf Hadice bt. Mehmed ve oğlu Demirci [Mehmed] b. el-Hâc Ali ve mezbûr Mehmed’in zevcesi Zenciye Âişe ve âhar zevcesi Fâtıma ve üvey oğlu Mehmed Tahir’in zevcesi Âişe muvâcehelerinde herbiri tazallüm-ı hâl edip mezbûrûn Hadice ve Mehmed ve Zenciye Âişe ve Fâtıma ve Mehmed Tahir ve Âişe mahallemiz ahâlîsinden olup lâkin kendi hâllerinde olmayıp celb-i menfa‘at zımnında nâ-mekân olan avratları ve ricâlden mechûlü’l-ahvâl kimesneleri leylen mahfî hufyeten menzillerine idhâl ve herbiri âhara ecnebî olduğu hâlde iskân edip bu vechile menhiyâtdan olan ef‘âl-i kabîhayı icrâya mütecâsir olmalarıyla bi’d-defa‘ât kendilere tenbîh eylediğimizde kat‘â mütenebbihler olmayıp harekât-ı nâ-marziyyelerinde ısrâr üzere olmağın mezbûrûnun akvâllerinden kat‘â hoşnûd ve râzı değilleriz deyü bi’l-muvâcehe teşekkî ve ber-vech-i muharrer sû’-i hâllerini ihbâr ve mahalle-i merkūmeden bi-ecmâ‘ihim hurûcları bâbında fermân-ı âlîleri sudûrunu istirhâm ve istid‘â-yı inâyet etmeleriyle fi’l-hakīka ahâlî-i mahalle-i mezbûrenin iştikâları vâkı‘a mutâbık olup mezbûrûndan herbirleri kendi hâllerinde olmayıp fesâd ile me’lûf oldukları civârında kâin Okçu Musa ve Câmi‘-i kebîr ve Yolcuzâde ve el-Hâc Ömer nâm dört mahalle ahâlîlerinden dahi ba‘de’t-tahkīk bu sûretde ahâlî-i mahallenin istirhâmlarına müsâ‘ade ile li-ecli’t-tedîb mezbûrûnun bi-ecmâ‘ihim mahalle-i mezkûreden ihrâcları bâbında fermân-ı âlîleri sudûru emr-i savâb idüğü ma‘lûm-ı âsafâneleri buyruldukda ol bâbda emr hazret-i veliyyü’l-emr[indir]. Fî 14 L sene 1221.