Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 311 Hüküm no: 479 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giritli Ahmed Kapudan’ın tasarrufundaki terzi dükkanındaki gedik tabir olunan alet ve edevatını kiracısı Yorgi v. Hıristo’ya iki yüz guruşa satıp aylık yüz para kira ücretiyle dükkânda kalmasına izin verdiği Zikri câ’î dükkânın bi’l-icâreteyn mutasarrıfı Giridî Ahmed Kapudan b. Mustafa Galata’da mahfil-i kazâda abacı derzileri esnâfından zikri âtî dükkânda müsteciri Yorgi v. Hıristo zimmî muvâcehesinde esnâf-ı merkūme kethüdâsı el-Hâc Ya‘kub Ağa ve yiğitbaşıları Ömer Beşe ve sâir isimleri mazbût on neferden mütecâviz müsinn [ü] ihtiyâr ustalar hâzır oldukları hâlde takrîr-i kelâm edip mersûm Yorgi zimmî mahrûse-i mezbûre hısnı ebvâbından Balıkpazarı hâricinde kâin bir kıt‘a hayyât dükkânı bi’l-icâreteyn dâhil-i tasarrufum ve derûnunda mevcûd abacı derzisi gediği tâ‘bir olunur bir destgâh ve bir çekmece ve bir akçe tahtası ve sâir âlât-ı ma‘lûme yedimde mülküm olduğu ecilden mersûm Yorgi zimmî dükkân-ı mezkûrda aded-i şühûr beyân olunmaksızın beher şehr yüzer para icâre ile müşâhereten müstecirim olup lâkin dükkân-ı merkūmun bana lüzûmu olmağla târih-i i‘lâm şehri gāyetine izâfetle fesh-i îcâr etmemle gāyet-i şehr-i mezkûrda dükkân-ı merkūmdan hurûca mersûm Yorgi zimmîye tenbîh olunmak matlûbumdur deyü [da‘vâ]ya tasaddî eylediğimde mersûm Yorgi zimmî dahi cevâbında kethüdâmız hâzır-ı mezbûrun yedine i‘tâ buyrulan emr-i âlîşân mantûkunca gedik tâ‘bir olunan âlât-ı muharrere-i mezkûre benim yedimde malım olup bu makūle dükkân mutasarrıflarının gedik ashâbı olan müstecirlerini bî-vech ihrâca tasaddîleri memnû‘ ve nizâm-ı kadîmimiz vech-i meşrûh üzere cârî olagelmişdir deyü hurûcdan imtinâ‘-birle beynimizde ba‘de vukū‘ı’l-münâza‘a ve bâ-vesâtet-i muslihîn beynimiz tevfîk ve ıslâh olunup ben ber-vech-i meşrûh mâlik olduğum gedik tâ‘bir olunur âlât-ı muharrere-i mezkûreyi iki yüz guruş semen-i makbûza mersûm Yorgi zimmîye bey‘ ve temlîk ve dükkân-ı mezkûru dahi târih-i i‘lâmdan beher şehr yüz para icâre-i kadîmesiyle îcâr ve teslîm eylediğimde ol dahi ber-vech-i muharrer iştirâ ve temellük ve istîcâr ve kabz ve kabûl-birle kat‘-ı münâza‘a eyledik deyü ikrâr ve tasdîkleri bi’l-iltimâs huzûr-ı âlîlerine i‘lâm olundu. Fî 11 Şevvâl sene [1]221.