Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 850 Hüküm no: 1113 Orijinal metin no: [133b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın, evini Hasan Beşe b. Süleyman’a sattığı Mahmiye-i İstanbul’da Aksaray kurbunda Çakır Ağa mahallesinde sâkine Hatice bt. Abdullah nâm hâtun meclis-i şer‘-i şerîfde bâ‘isü’l-kitâb Hasan Beşe b. Süleyman mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezkûrede vâki‘ bir tarafdan Mehmed Odabaşı mülkü ve bir tarafdan İbrahim Paşa sarayı ve bir tarafdan İbrahim Çorbacı mülkü ve bir tarafdan tarîk-i âm ile mahdûd üç bâb fevkānî oda ve bir su kuyusu ve bir kenîf ve hadîkayı müştemil menzilimi cümle tevâbi‘ ve levâhıkı ve kâffe-i hukūk ve merâfıkı ile merkūm Hasan Beşe’ye elli bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr elli bin akçenin yüz seksen esedî guruş olmak üzre on sekiz bin akçesini müşterî-i merkūma cihet-i kefâletden deynim olan yüz seksen esedî guruşa takās ol dahi mukāssa ve kabûl eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Kasab Mehmed Beşe b. ( ), Hamza Beşe b. Yusuf, Hüseyin Bey Bevvâb-ı sultânî, Mehmed b. Ahmed, Hacı İbrahim, Mehmed Çelebi b. ( ) el-Müezzin.