Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 849 Hüküm no: 1112 Orijinal metin no: [133b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mimar fırının ekmeğinin satıldığı iskemlenin yanında macuncu fırını ekmeğinin satılmaması Mahmiye-i İstanbul’da Yenikapı kurbunda Mi‘mâr fırınının üstâdı olan Bogos v. Hataros ve destgâhdârı Kiroz v. Frenk nâm Ermeniler her biri meclis-i şer‘-i şerîfde takrîr-i kelâm ve ta‘bîr ani’l-merâm edip bizim fırınımızın kadîmü’l-eyyâmdan Seyyid Ömer mahallesinde vâki‘ Küçük Hamam kurbunda ekmek bey‘ olunmak için bir iskemlesi olup kadîmü’l-eyyâmdan ilâ hâze’l-ân zikr olunan mahallede iskemle ile ancak bizim fırınımızın ekmeği bey‘ oluna gelmiş iken ma‘cûncu fırınının üstâdı olan Avanos v. Vartan nâm Ermeni hâlâ fuzûlen bizim iskemlemiz kurbunda iskemle ihdâs etmekle bizim kisbimize kesâd târî olmuşdur hâlâ yedimizde olan buyruldu-yı şerîf mûcebince cânib-i şer‘den üzerine varılıp hakīkat-i hâli bî-garaz müslimînden suâl olunup mezbûr Avanos’un ihdâs eylediği ekmek iskemlesi ref‘ olunmak matlûbumdur dediklerinde, savb-ı şer‘den mevlânâ keşfî Mustafa Efendi irsâl olunup ol dahi zeyl-i rakīmde muharrerü’l-esâmî olan müslimîn ile zikr olunan mahalleye varıp mezbûr Avanos muvâcehesinde hakīkat-i hâli suâl eyleyip hâlâ ekmekçiler kethüdâsı olan Mehmed Çelebi b. Bayezid nâm kimesne ile mahalle-i mezbûre ahâlîsinden Mustafa Ağa b. Abdülkādir Ağa b. Ali ve mahalle-i mezbûre imâmı Ahmed Efendi b. Nurullah ve Hasan Beşe b. Mehmed ve Ahmed Efendi [b.] Halil ve Mustafa Çelebi b. Süleyman ve Hasan [b.] Hızır ve diğer Hasan Çelebi b. Nurullah nâm kimesneler her biri zikr olunan iskemlede kadîmü’l-eyyâmdan ilâ hâze’l-ân ancak Mi‘mâr fırınının ekmeği bey‘ olunageldiğini haber verdiklerinden sonra vâki‘ hâli mevlânâ-yı mezbûr mahallinde tahrîr, ba‘dehû ma‘an irsâl olunan Veli b. Mahmud ile meclis-i şer‘a gelip alâ vukū‘ihî inhâ ve takrîr ettikden sonra mezbûr Avanos’a zikr olunan muhdes iskemleyi ref‘a tenbîh birle mâ vaka‘a bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Osman Efendi b. Ali, Mehmed b. İbrahim, Ahmed b. Murtaza, Murtaza Halîfe b. ( ) el-Müezzin, Hasan Beşe Ketenci.