Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 333 Hüküm no: 514 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarayil bt. Kamal’in mahzenini kendisine kiraya vermesi için Emine Hatun’a zor kullanılması yolundaki isteğinin meşru olmadığı Şahsı mu‘arrefe Sarayil bt. Kamal Yahûdiye Galata’da mahfil-i kazâda bâ‘isetü’l-i‘lâm mu‘arrefetü’z-zât Emine Hatun bt. el-Hâc Veliyüddin muvâcehesinde ben bundan akdem mahrûse-i Galata’da Câmi‘-i cedîd Mahallesi’nde kafesçi dükkânı ittisâlinde mezbûre Emine Hatun’un mutasarrıfe olduğu bir bâb kârgir mahzende beher şehr icâre-i kadîme ile müşâhereten müsteciri iken mezbûre Emine Hatun bundan mukaddemce fesh-i îcâr ile mahzen-i mezkûrdan beni ihrâc ve icâre-i kadîmesine ziyâde meblağ zamla mahzen-i merkūmu işbu hâzır bi’l-meclis İsak Yahûdi’ye îcâr ve teslîm etmişidim lâkin benden mukaddem mahzen-i mezkûrda müsteciren mütemekkin olan gāib ani’l-meclis Venedikli müste’men Yahûdi mahzen-i merkūmun hâli gediği benimdir deyü bana bir kıt‘a temessük vermiş olmağla mücerred yedimde gāib-i mersûmun temessüğü olduğunu binâen mahzen-i mezkûrda icâre-i kadîmesiyle beni iskâna mezbûre Emine Hatun’a cebr olunsun deyü tasaddî eylediği da‘vâsı takrîr-i meşrûhu üzere meşrû‘a olmayıp mezbûre Emine Hatun’a suâl dahi teveccüh etmemekle bî-vech mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 11 Ra sene 1221.