Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 338 Hüküm no: 524 Orijinal metin no: [51b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gapril v. Ohannes’in yanan evini komşularının mahremiyetini ihlâl etmeyecek yükseklikte yapmaya söz verdiği Sâdır olan fermân-ı âlîlerine imtisâlen Galata Bâb Mahkemesi’nde meclis-i şer‘den mürsel müderrisîn-i kirâmdan Kâtib es-Seyyid Abdülfettâh Efendi dâ‘îleri ve hâssa mi‘mârı hulefâsından es-Seyyid Mustafa ve Mustafa Râşid halîfeler ile Galata’da Bereketzâde Mahallesi’nde vâki‘ derûn-ı arzuhâlde mersûmü’l-ism Gapril v. Ohannes nâm zimmînin bu esnâda vukū‘ bulan harîkde muhterik olan ma‘lûmü’l-hudûd ve henüz binâsına şürû‘ olunan mutasarrıf olduğu menzili arsası üzerine varıp huzûr-ı Müslimînde akdeylediği meclis-i şer‘de mahalle-i merkūme ahâlîsinden olup mersûm Gapril zimmînin câr-ı mülâsıkları ashâb-ı arzuhâl Andon v. Mihal ve Manuk v. Kigork ve Refayil v. Kigork ve Kirkor v. Andon nâm zimmîler meclis-i ma‘kūd-ı mezkûrda mersûm Gapril zimmî muvâcehesinde mersûm Gapril zimmî mutasarrıf olduğu muhterik menzilini vaz‘-ı kadîminden ziyâde terfi‘ ve kiremit üzerine tahte’s-semâ ve cihân-nümâ binâsı irâdesinde olmağla mi‘mârân-ı mezbûrânın mesâhalarıyla sokak kapısı hâricinde kadd ü irtifâ‘ı hey’et-i asliyyesi ve vaz‘-ı kadîmî olan on bir buçuk zirâ‘dan ziyâde terfi‘ ve kiremit üzerine cihânnümâ ve tahte’s-semâ binâ etmemek üzere mersûm Gapril zimmîye tenbîh olunmak matlûbumuzdur dediklerinde ol dahi kadd ü irtifâ‘ını vaz‘-ı kadîmî ve hey’et-i asliyyesi olan on bir buçuk zirâ‘ binâya ziyâde terfi‘ ve kiremit üzerine cihânnümâ ve tahte’s-semâ etmemek üzere ta‘ahhüd eylediğini mezbûr dâ‘îleri mahallinde ba‘de’t-tahrîr ve’l-inhâ mübâşirleri es-Seyyid Lütfullah Çavuş kulları yediyle huzûr-ı âlîlerine [i‘lâm olundu.] Fî 19 Ra sene 1221.