Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 337 Hüküm no: 523 Orijinal metin no: [51b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Bedro’nun yanan evini komşuların mahremiyetini ihlal etmeyecek yükseklikte yeniden yapmaya söz verdiği Mahrûse-i Galata mahallâtından Bereketzâde Mahallesi imâmı es-Seyyid Ali Efendi ve müezzini es-Seyyid Hasan Efendi ve ahâlîsinden el-Hâc Ya‘kub Ağa ve es-Seyyid Mustafa Ağa ve el-Hâc Ahmed Ağa ve Hasan Ağa ve Kādızâde Mehmed Ağa ve diğer es-Seyyid Mustafa Ağa ve es-Seyyid Süleyman Ağa ve es-Seyyid Ya‘kub Ağa ve Mehmed Ağa ve Abdurrahman Çavuş ve eş-Şeyh es-Seyyid Abdurrahman Efendi ve es-Seyyid Ebûbekir Ağa ve Molla Ahmed ve Halil Ağa ve el-Hâc Mehmed Ağa ve el-Hâc Mehmed ve el-Hâc Abdurrahman ve Mehmed Kapudan ve Ali Yazıcı ve âhar es-Seyyid Mustafa ve Ömer Çavuş ve Memiş Çavuş ve İbrahim Çavuş ve Mehmed Salih Ağa ve Osman ve Ketenci Molla Osman ve es-Seyyid Mehmed Sâdık Ağa ve diğer el-Hâc Mehmed Ağa ve mahrûse-i mezbûrede mahfil-i kazâda mahalle-i mezbûre ahâlîsinden Agop v. Bedros’un oğlu ve tarafından husûs-ı âtîde vekîl-i mürseli Yoseb zimmî muvâcehesinde herbiri takrîr-i kelâm ve ifâde-i merâm edip ve işbu sene-i mübâreke Ramazan-ı şerîfi’nde vukū‘ bulan Galata harîkinde müeccel-i mersûm Agop zimmînin mutasarrıf olduğu menzili külliyyen muhterik olup bu esnâda binâya şürû‘ eyledikde kadd ü irtifa‘ husûsunda beynimizde münâza‘ât-ı kesîre cereyân etmişidi el-hâletü hâzihî beynimiz tevfîk ve ıslâh olunup müvekkil-i mesfûr Agop zimmî mutasarrıf olduğu menzilinin sokak kapısı cânibinden vaz‘-ı kadîmi üzere on üç zirâ‘ binâsını terfi‘ edip on üç zirâ‘dan ziyâde terfi‘ etmemeğe ta‘ahhüd eyledikde bizler dahi râzı ve teşekkîden fâriğ olup bu vechile kat‘-ı münâza‘a ve ref‘-i husûmet eyledik deyü ikrâr ve tasdîkleri tescîl-i huzûr-ı âlîlerine i‘lâm olundu. Fî 17 Ra sene 1221.