Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 340 Hüküm no: 527 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü İbrahim Çelebi’nin eski ortağı Seyyid Mehmed’den bin üç yüz guruş alacağı olduğu Galata’da sâkin kömürcü esnâfından İbrahim Çelebi b. İsmail nâm kimesne Galata Bâb Mahkemesi’nden meclis-i şer‘de yine esnâf-ı mezbûreden şerîki es-Seyyid Mehmed b. Yusuf nâm kimesne muvâcehesinde ben bundan akdem mezbûr es-Seyyid Mehmed ile fâide-i hâsılası beynimizde müsâvî olmak üzere kömür bey‘ u şirâsında bir müddet şerîk olup hâlâ fesh-i akd-i şirket-birle hesâbımız kethüdâmız ve esnâf-ı merkūme huzûrlarında galat ve sehivden ârî ve berî hesâb-ı sahîh ile rü’yet eylediğimizde gerek re’s-i mâl ve gerek fâide-i hâsıladan benim hisseme isâbet eden bin üç yüz guruşu bana vermemekle hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr İbrahim Çelebi ber-vech-i muharrer müdde‘âsını lede’t-tezkiye şehâdetleri makbûle olan esnâf-ı merkūme kethüdâları Osman Ağa b. Ahmed ve esnâf-ı merkūmdan Hasan Beşe b. Mehmed nâm kimesneler şehâdetleriyle mezbûr es-Seyyid Mehmed muvâcehesinde vech-i şer‘î üzere isbât etmeğin mûcebince meblağ-ı mezkûr bin üç yüz guruşu müdde‘î-i mezbûr İbrahim Çelebi’ye edâ ve teslîme mezbûr es-Seyyid Mehmed’e tenbîh olunduğu bi’[l]-iltimâs huzûr-ı âlîlerine i‘lâm olundu. Fî 23 Ra sene 1221.