Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 341 Hüküm no: 529 Orijinal metin no: [52a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Küçük Mehmed Çavuş’un iptal edilen gedik alış-verişinde İmam Sadullah Efendi ve oğlunun zimmetlerini ibra ettiği Galata’da sâkin Kalyoncu Küçük Mehmed Çavuş b. Mustafa nâm kimesne Galata Bâb Mahkemesi’nde meclis-i şer‘de İmâm Sadullah Efendi b. İbrahim Efendi muvâcehesinde mezbûr Sadullah Efendi bi’l-icâreteyn mutasarrıf olduğu Galata’da Karaköy Hamamı karşısında vâki‘ hayyât dükkânı derûnunda mevcûd gedik tâ‘bir olunur bâ-defter eşyâ-i ma‘lûme mâlı olduğu ecilden eşyâ-i merkūmeyi bundan akdem iki yüz guruş semen-i makbûza bana bey‘ ve temlîk ve teslîm eylediğinde ben dahi iştirâ ve tesellüm ve kabz ve kabûl etmişidim lâkin dükkân-ı merkūm bu esnâda muhterik oldukda ben dahi gedik tâ‘bir olunan eşyâ-i ma‘lûmeyi tağrîr ve gabn da‘vâsıyla kendiye redd ü teslîm ve [kabz-ı] semen olmak üzere kendiye medfû‘um olan iki yüz guruşu mezbûr Sadullah Efendi yedinden tamamen ve kâmilen ahz u kabz edip ba‘de’l-yevm dükkân-ı mezkûrda ve gediğinde benim kat‘an alâka ve medhalim kalmamağla husûs-ı mezkûra ve târih-i i‘lâma gelince bi’l-cümle beynimizde cereyân eden ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan mezbûr Sadullah Efendi ile oğlu işbu hâzır bi’l-meclis Ya‘kub Efendi’nin zimmetlerini kabûllerini hâvî ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fi’l-yevmi’l-hâdî ve’l-ışrîn min-Zilka‘deti’ş-şerîfe li-sene ihdâ ve işrîn ve mi’eteyn ve elf.