Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 341 Hüküm no: 530 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Diyon v. Karabet’in ortak tasarruflarında olan vakıf menzili ile altındaki şerbethanedeki yarım hissesini kendisine devretmesi için ortağı Sekyas v. İsayi’ye zor kullanılması talebinin meşru olmadığı Mahrûse-i Galata hâricinde Beyoğlu’na Kamer Hatun Mahallesi’nde mutavattın şerbetçi esnâfından Diyon v. Karabet zimmî mahrûse-i mezbûrede mahfil-i kazâda esnâf-ı merkūmeden Sekyas v. İsayi zimmî muvâcehesinde mahrûse-i mezbûre dâhilinde vâki‘ şerbetçi esnâfının ustabaşıları Aslan ve Beyoğlu ustabaşısı Marko ve müsinn [ü] ihtiyâr ustalarından Apiri ve Yanako ve İstavri ve Yorgo ve Artin ve Aci Artin ve Sahak ve Kigork ve Anatos ve diğer Yorgi zimmîler hâzır olduğu hâlde mârru’z-zikr Kamer Hatun Mahallesi’nde vâki‘ tahtında bir kıt‘a şerbethâneyi hâvî hudûdu ve müştemilâtı beynimizde ma‘lûm bir bâb vakıf menzil bâ-temessük-ı mütevellî ale’l-iştirâki’s-seviyy mersûm Sekyas zimmî ile bi’l-icâreteyn tasarrufumuzda olup şerbethâne-i merkūme derûnunda mevcûde erbâbı beynlerinde şerbetçi gediği tâ‘bir olunur bâ-defter-i müfredât âlât-ı lâzımeyi târih-i i‘lâm senesi Şa‘bânı evâili tarihiyle müverrah ve bâlâsı sahh-ı mekârim-sümûh ile muveşşah hâmiş-i arzuhâlde muharrer işbu bir kıt‘a diğer i‘lâm mantûku [üzere] mersûm Sekyas zimmînin gālî bahâ ile âhardan müşterâ [ve] müstakillen yedinde mâlı olmağla ber-mantûk-ı diğer i‘lâm-ı mezkûr menzil-i merkūm ile şerbethâne-i mezkûreyi ber-vech-i münâsafa tasarruf edip mersûm Sekyas zimmînin müstakillen mâlik olduğu gedik tâ‘bir olunan âlât [ve] eşyâ-i ma‘lûmeye ilgā dâ‘iyyesiyle müdâhale ve ber-vech-i iştirâk tasarruf da‘vâsına tasaddî eylediğimde bî-vech-i şer‘î müdâhaleden men‘ olunmuşidim lâkin işbu târih-i i‘lâmdan on beş gün mukaddem mersûm Sekyas zimmînin müstakillen mâlik olduğu gedik tâ‘bir olunan âlât-ı ma‘lûmeyi mahzar-ı şuhûdda mâliki zimmî-i mersûmdan istişrâ ve vakıf şerbethâne ve menzilde olan nısf hisse-i şâyi‘asını istifrâğ eylediğimde mersûm Sekyas zimmî dahi mâlik olduğu âlât-ı ma‘lûmeyi 1.750 guruş semen tesmiyesiyle bana bey‘a ve menzil-i mezbûr ile şerbethâne-i merkūmenin tasarrufunda olan nısf-ı şâyi‘lerini dahi 3.750 guruş bedel mukābelesinde bâ-re’y-i mütevellî ferağa müte‘ahhide oldukdan sonra bedel-i merkūm ile semen-i mezkûrdan müctemi‘ olan 5.500 guruşu on beş [gün] zarfında tedârük eyle deyü beni imhâl etmişidi el-hâletü hâzihî ben meblağ-ı mecmû‘-ı mezkûr 500 guruşu tedârük eylediğimde mersûm Sekyas meblağ-ı mezkûru kabzdan ibâ ve ber-vech-i muharrer bey‘ ve ferağdan imtinâ‘ etmekle suâl olunup müte‘ahhid olduğu vech üzere bey‘ ve ferağa cebr olunmak matlûbumdur deyü tasaddî eylediği da‘vâ-yı meşrûhu üzere va‘ad makūlesinden olmağla meşrû‘a ve müfîde olmayıp mersûm Sekyas zimmîye şer‘an suâl dahi teveccüh etmediği müdde‘î-i mesfûra ba‘de’l-yevm bu sûretde ber-mantûk-ı diğer i‘lâm-ı mezkûr mesfûrânın ale’l-iştirâki’s-seviyy tasarruflarında olan vakıf menzil ve şerbethâne ber-vech-i iştirâk-i seviyy tasarruf edip mesfûr Sekyas zimmînin müstakillen mâlik olduğu gedik tâ‘bir olunan âlât-ı ma‘lûmeye bî-vech-i şer‘î müdâhaleden müdde‘î-i mesfûr Diyon zimmî men‘ olunduğu bi’[l]-iltimâs [huzur-ı âlîlerine i‘lâm olundu.] Fî 23 Za Sene 1221.