Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 851 Hüküm no: 1115 Orijinal metin no: [134a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mano v. Nikola’nın, Süleyman Çelebi b. Yusuf’a olan borcuna Hasan b. Ahmed’in kefil olduğu Mahmiye-i İstanbul’da ekmekçi tâifesinden Mano v. Nikola nâm zimmî meclis-i şer‘-i şerîf-i lâzımü’t-teşrîfde Süleyman Çelebi b. Yusuf nâm kimesne ile Komri v. Dimo nâm zimmî mahzarlarında ikrâr ve takrîr-i kelâm edip merkūm Süleyman Çelebi’ye yedinden müşterâ ve makbûz yüz doksan yedi buçuk keyl buğday semeninden bâkī beş bin yedi yüz seksen beş akçe zimmetimde vâcibü’l-edâ deynim olmağla meblağ-ı mezbûru merkūm Komri’den üçümüz bir yerde iken havâle-i sahîha-i şer‘iyye ile havâle edip anlar dahi kabûl eylediler dedikde mezbûrân Süleyman Çelebi ve Komri mukırr-ı mezbûru cemî‘ kelimâtında tasdîk ve tahkīk ettiklerinden sonra medîne-i Üsküdar’da Bulgurlu mahallesinde sâkin Hasan b. Ahmed nâm kimesne emr [ve] kabûlü hâviye kefâlet-i sahîha-i şer‘iyye ile meblağ-ı bâkī-i mezbûr beş bin yedi yüz seksen beş akçeye kefîl olmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdi Kethüdâ-yı muhzırân, Baba Resul [b.] Rıdvan, Hasan Çelebi b. Ahmed, Mehmed b. Ramazan.