Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 348 Hüküm no: 540 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Bogos’un çırak olarak verdiği oğlunun “şerbetlik” adıyla aldığı bahşişlerden Berber Refayil v. Ohannes’ten alacağı olduğu iddiasıyla açtığı davada iddiasını ispat edemediği Mahmiye-i İstanbul’da Yağcı Hanı’nda mütemekkin Ohannes v. Bogos nâm zimmî Galata Bâb Mahkemesi’nde meclis-i şer‘de berber esnâfından Refayil v. Ohannes nâm zimmî muvâcehesinde esnâf-ı mezbûrenin kethüdâları es-Seyyid el-Hâc Mustafa Ağa hâzır olduğu hâlde ben târih-i i‘lâmdan altı ay mukaddem oğlum işbu hâzır bi’l-meclis Pake nâm sagīri berberlik san‘atını ta‘lîm için mersûm Refayil zimmî[ye] şâkird olmak üzere teslîm etmişidim hâlâ oğlum mersûmu, mersûm Refayil zimmî yanından ihrâc edip müddet-i mezkûrede âhar kimesnelerin şerbetlik nâmıyla oğlum sagīr-i mersûma medfû‘ları olan cem‘an doksan altı guruş mersûm Refayil zimmî sagīr-i mersûmdan bi-gayr-ı hakkın ahz etmekle hâlâ meblağ-ı mezkûr doksan altı guruşu mersûm Refayil zimmîden bi’l-velâye taleb ederim deyü ba‘de’d-da‘vâ ve’l-inkâr müdde‘î-i mersûm Ohannes zimmî ber-vech-i muharrer müdde‘âsına ikāmet-i beyyine edemeyip yine tâlib-i tahlîf dahi olmamağın mûcebince müdde‘î-i mersûm Ohannes zimmî da‘vâ-yı mezkûresiyle mersûm Refayil zimmîye bilâ-beyyine mu‘ârazadan men‘ olunduğu bi[‘l]-iltimâs huzûr-ı âlîlerine i‘lâm olundu. Fî 26 Za sene 1221.