Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 347 Hüküm no: 539 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Abbas Kapudan’ın evli iken ferağ bedelinin tamamını kendisinin ödediği vakıf menzildeki hissesini kendisine devretmesi için eski karısı Fâtıma aleyhine açtığı davanın meşru olmadığı Tüccâr sefâin kapudanlarından el-Hâc Abbas Kapudan b. Yusuf Galata’da mahfil-i kazâda sâbık zevce-i medhûlün-bihâsı zâtı mu‘arrefe Fâtıma bt. Hüseyin nâm hatun muvâcehesinde vilâyet-i Rumeli’de Drama kasabasında Sirvili [Servili] Câmi‘-i şerîfinde îkād-ı kanâdil vakfı musakkafâtından mahrûse-i Galata’da Yolcuzâde Mahallesi’nde vâki‘ beher şehr on beş akçe icâre-i müecceleli bir bâb vakıf menzil gāibe ani’l-meclis ismi ma‘lûmum olmayan bir hatunun tasarrufunda iken bundan akdem gāibe-i mezbûre sekiz yüz guruş bedel mukābelesinde menzil-i mezkûrun nısf-ı şâyi‘ini bana ve nısf-ı şâyi‘-i âharını zevce-i sâbıkām mezbûre Fâtıma Hatun’a bâ-re’y-i mütevellî ferağ ve kasr-ı yed ve mütevellîsi dahi ber-vech-i munâsafe tasarrufumuzu re’y-i [mütevellî ile] defter-i vakfa kayd eyledikden sonra bedel-i merkūmdan mezbûre Fâtıma Hatun’un hissesine isâbet eden dört yüz guruşu ol tarihde zevcem olduğu ecilden bilâ-taleb bi’r-rızâ kendi mâlımdan fâriğa gāibe-i merkūmeye kendi hisseme isâbet eden 400 guruş ile ma‘an def‘ u teslîm etmişidim el-hâletü hâzihî beynimizde müfârakat vâki‘ olmağla mezbûre Fâtıma hatun menzil-i merkūmda mutasarrıfe olduğu nısf hissesinden keff-i [yed] edip bana teslîm eylesin deyü tasaddî eylediği da‘vâsı takrîr-i meşrûhu üzere meşrû‘a olmayıp ol vechile kapudan-ı merkūmun kelâmına iltifât olunmadığı bi[‘l]-iltimâs huzûr-ı âlîlerine i‘lâm olundu. Fî ( )