Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 350 Hüküm no: 546 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Frankoli v. Yorgi’nin bedeli zikredilmeden Dimitri v. Kostantin’e sattığını iddia ettiği halatın satışının geçersiz olduğu Tüccârdan Frankoli v. Yorgi zimmî Galata’da mahfil-i kazâda Dimitri v. Kostantin zimmî muvâcehesinde ben bundan akdem mâlik olduğum üç yüz beş guruş kıymetli halatımı vezni ve semen tesmiye olunmaksızın mersûm Dimitri zimmîye bey‘ ve teslîm etmişidim el-hâletü hâzihî kıymeti olan üç yüz beş guruş mütâlebe eylediğimde zikrolunan halatı bana bi’l-emâne teslîm eyledin deyü kıymetini vermekden imtinâ‘ ve sâlifü’z-zikr halatı redd ü teslîm murâd etmekle suâl olunup kıymet-i mezkûresini bana vermeğe mersûm Dimitri zimmîye cebr olunsun deyü tasaddî eylediği mübâya‘a da‘vâsı takrîri üzere semen tesmiye olunmaksızın fâsid olup ol vechile iltifâta şâyân olmayıp müdde‘î-i mersûm Frankoli zimmî mebî‘-i mezkûru geri ahz edip semen mütâlebesiyle bî-vech-i şer‘î mu‘ârazadan men‘ olunduğu bi[‘l]-iltimâs huzûr-ı âlîlerine i‘lâm olundu. Fî 22 Za sene 1221.