Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 369 Hüküm no: 588 Orijinal metin no: [58a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezci Ali Beşe b. Mehmed’in yelken bezi bedelinden Yelkenci Mehmed b. İbrahim’den elli guruş alacağı olduğu Ma‘rûz-ı dâ‘î-i Devlet-i Aliyyeleridir ki Bezci Ali Beşe b. Mehmed nâm kimesne Galata’da Bâb Mahkemesi’nde kimesne meclis-i şer‘de Yelkenci Mehmed b. İbrahim nâm [kimesne] muvâcehesinde mezbûr Mehmed zimmetinde zirâ‘ ve fiyatı beynimizde ma‘lûm yelken bezi semeninden yüz yetmiş sekiz guruş otuz paradan bâkī elli guruş dahi alacak hakkım olmağla hâlâ taleb ederim deyü da‘vâ eyledikde ol dahi ber-vech-i muharrer ikrâr lâkin meblağ-ı bâkī-i mezkûr elli guruşu dahi kendiye tamamen edâ ve teslîm etmişidim deyü eylediği def‘ini isbâta kādir olmayıp bi’t-taleb müdde‘î-i mezbûr Ali Beşe ba‘de’t-tahlîfü’ş-şer‘î mûcebince meblağ-ı bâkī-i mezkûr elli guruşu müdde‘î-i mezbûr Ali Beşe’ye edâ ve teslîme mezbûr Mehmed’e tenbîh olunduğu huzûr-ı âlîlerine i‘lâm olundu el-emr li-men lehü’l-[emr.] Fî 14 M sene 1222.