Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 370 Hüküm no: 591 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nemçeli Tâcir Andon v. Kukla’nın Reis Nikola v. İstavri aleyhine açtığı alacak davasında bin guruşa sulh olduğu Nemçe tüccârından Andon v. Kukla nâm müste’men Galata Bâb Mahkemesi’nde meclis-i şer‘de sefîne reislerinden Nikola v. İstavri zimmî muvâcehesinde Nemçe tercümânı tarafından Kapıoğlanı Ayvaz hâzır olduğu hâlde mersûm Nikola Reis zimmînin Rûmiyyü’l-ibâre bir kıt‘a deyn temessükü mantûkunca cihet-i karzdan bin yüz elli guruş alacak hakkım olmağla hâlâ taleb ederim deyü da‘vâ eyledikde ol dahi cevâbında meblağ-ı mezkûru ahzını ikrâr lâkin müdde‘î-i müste’men-i mesfûr bir husûsun temşiyeti’çün meblağ-ı merkūm bin elli guruşu rüşvet tarîkiyle gāib ani’l-meclis Ali Çavuş’a ver deyü bana emretmekle ben dahi emr-i mezkûru üzere meblağ-ı mezkûru gāib-i mezbûra teslîm etmişidim deyü def‘a tasaddî-birle beynlerinde ba‘de vukū‘ı’l-münâza‘a beynlerine muslihûn tavassut edip müdde‘î-i müste’men-i mesfûr tasaddî eylediği da‘vâ-yı mezkûresinden mersûm Nikola Reis ile bin guruşa ba‘de’s-sulh ve’l-kabûl bedel-i sulh-ı merkūmdan mâ‘adâ yüz elli guruşa müte‘allika da‘vâdan reis-i merkūm Nikola zimmînin zimmetini kabûlünü hâvî ba‘de’l-ibrâ ibrâdan müstesnâ bedel-i sulh-ı merkūm bin guruş mersûm Nikola Reis zimmetinde kalmağla hâlâ taleb ederim deyü da‘vâ ettikde reis-i mersûm dahi ber-vech-i muharrer tâyi‘an ve kat‘iyyen ikrâr u i‘tirâf etmeğin mûcebince bedel-i sulh-ı merkūm bin guruşun müdde‘î-i müste’men-i mesfûr Andon’a edâsıyla mersûm Nikola Reis ilzâm olunduğu bi’l-iltimâs [huzûr-ı âlîlerine i‘lâm olundu.] Fî 17 Muharrem sene [1]222.