Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 375 Hüküm no: 600 Orijinal metin no: [59a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan Alemdâr’ın karzdan Kalyoncu Balatlı Mehmed Çavuş’dan doksan dört guruş alacağı olduğu Galata’da Arab Çarşısı’nda sâkin es-Seyyid Hasan Alemdâr b. es-Seyyid Mustafa nâm kimesne Galata Bâb Mahkemesi’nde meclis-i şer‘de Kalyoncu Balatlı Mehmed Çavuş b. Ahmed[‘de] alacak hakkım olup hattâ deyn-i mezkûru nâtık bin iki yüz yirmi bir senesi Cemâziyelevveli’nin on ikinci günü tarihiyle karz unvânıyla işbu deyn temessükünü yedime i‘tâ ettikden sonra meblağ-ı mezkûrun yirmi altı guruşunu yedinden ba‘de’l-ahz bâkī kalan doksan dört guruşu mezbûr Mehmed Çavuş’dan taleb ederim deyü da‘vâ ettikde ol dahi cevâbında temessük-ı merkūmu ikrârından mâ‘adâ müdde‘î-i mezbûr es-Seyyid Hasan Alemdâr ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan Oturakçı Hüseyin Efendi b. İbrahim ve Oturakçı Mehmed Ağa b. Ali nâm kimesneler şehâdetleriyle mezbûr Mehmed Çavuş muvâcehesinde vech-i şer‘î üzere isbât etmeğin mûcebince meblağ-ı bâkī-i mezkûr doksan dört guruşu müdde‘î-i mezbûr es-Seyyid Hasan Alemdâr’a edâ ve teslîme mezbûr Mehmed Çavuş’a tenbîh olunduğu bi[‘l]-iltimâs huzûr-ı âlîlerine i‘lâm olundu. Fî 19 M sene 1222.