Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 379 Hüküm no: 608 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Aleksi’nin alacağına kefaletinden dolayı Mihal v. Angeli’den yüz dört guruş alacağı olduğu Kirkor v. Aleksi zimmî Galata Bâb Mahkemesi’nde meclis-i şer‘de Mihal v. Angeli zimmî muvâcehesinde benim gāib ani’l-meclis Palaş zimmî zimmetinde “polatka” tâ‘bir olunan cihet-i karzdan alacak hakkım olan yüz beş buçuk guruşdan bâkī yüz dört guruşa mersûm Mihal bi’l-emr ve’l-kabûl kefîl ve zâmin olmağla bi-hükmi’l-kefâle meblağ-ı bâkī-i merkūm yüz dört guruş mersûm Mihal zimmîden taleb ederim deyü da‘vâ eyledikde ol dahi cevâbında meblağ-ı bâkī-i merkūmdan ancak otuz guruşa kefâletini ikrâr mâ‘adâyı ba‘de’l-inkâr müdde‘î-i mersûm Kiryako zimmî ziyâde kefâlet müdde‘âsına ikāmet-i beyyine edemeyip bi’t-taleb mersûm Mihal zimmî ba‘de’t-tahlîfü’ş-şer‘î mûcebince müdde‘î-i mersûm ziyâde müdde‘âsıyla bilâ-beyyine mu‘ârazadan ba‘de’l-men‘ ikrârıyla lâzım gelen meblağ-ı merkūm otuz guruşun müdde‘î-i mersûm Kiryako zimmîye edâsıyla mersûm Mihal zimmî ilzâm olunduğu bi[‘l]-iltimâs huzûr-ı âlîlerine i‘lâm olundu. Fî 20 M sene 1222.