Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 379 Hüküm no: 609 Orijinal metin no: [60a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Ağyazar v. Kazar’ın karzdan Abraham v. Kigork’dan yüz altmış iki guruş alacağı olduğu Galata’ya muzâfe kasaba-i Tophane’de mütemekkin Sarraf Ağyazar v. Kazar nâm zimmî Galata Bâb Mahkemesi’nde meclis-i şer‘de Abraham v. Kigork nâm zimmî muvâcehesinde mersûm Abraham zimmî zimmetinde bâ-temessük cihet-i karzdan üç yüz kırk guruşdan bâkī yüz seksen sekiz guruş alacak hakkım olmağla hâlâ taleb ederim deyü da‘vâ eyledikde ol dahi cevâbında cihet-i mezkûreden ancak yüz altmış iki guruş deyni olduğunu ikrâr mâ‘adâ yirmi altı guruşunu bilâ-devr-i şer‘î ribhdir deyü inkâr mersûm Abraham zimmî mikdâr-ı mezkûrda eylediği def‘ini isbâta ba‘de’l-havâle ikrârıyla lâzım gelen meblağ-ı mezkûr yüz altmış iki guruşu müdde‘î-i mersûm Ağyazar zimmîye edâsıyla mersûm Abraham zimmî ilzâm olunduğu bi[‘l]-iltimâs huzûr-ı âlîlerine i‘lâm olundu. Fî 9 M sene 1222.