Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 71 Hüküm no: 60 Orijinal metin no: [24-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş’un Panayot’a v. borçlu olduğunu ikrarı Oldur ki, mahmiye-i İstanbul’da Edirnekapısı sâkinlerinden Panayot v. Estati nâm zimmî meclis-i şer‘-i hatîr-i lâzımü’t-tevkīrde hâmilü’l-kitâb fahrü’l-emâcid ve’l-akrân İbrâhim Çavuş b. İbrâhim mahzarında takrîr-i kelâm edüp mezbûr İbrâhim Çavuş nâm kimesneye fıddî-i Osmânî nakd-i râyicü’l-vakt iki yüz seksen üç bin yedi yüz yirmi yedi akçeye dört bin yedi yüz yirmi yedi re’s ganemin her bir re’sine altmışar akçe kıymet etmek üzre bana bey‘ (…) [25] eden akçesin bi-hasebi’ş-şer‘ taleb ederin dedikde mezbûr İbrâhim Çavuş nâm kimesneye suâl olundukda cevâben merkūm Panayot yedinden ma‘lûmü’l-aded olan ganemi her bir re’sini altmışar akçe etmek üzre ahz u kabz eyledim dedikde mukırr-ı mezbûrun vech-i meşrûh üzre cârî olan ikrârın el-mukarru lehu’l-merkūm Panayot vicâhen ve şifâhen tasdîk ve tahkīk etmeğin vâki‘ hâl gıbbe’t-taleb ketb ve tâlibi yedine li-ecli’t-temessük def‘ olundu. Tahrîren fî-evâil-i Cemâziyelevvel li-sene erba‘a ve işrîn ve elf. Şuhûdü’l-hâl: Murad Çavuş b. Cafer, Müstedam Bey b. Abdullah, Receb Bey b. el-Cündî, Mehmed b. Mustafa, Hüseyin Bey el-Cündî, Mehmed Bey el-Cündî ve gayruhum mine’l-hâzırîn