Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 72 Hüküm no: 61 Orijinal metin no: [25-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cesedi bulunan Virgen isimli zimmî hakkında babası nın bir dava ve talebi olmadığı Hazret-i Ebî Eyyûb el-Ensârî -[aleyhi] rahmetü Rabbihi’l-Bârî- muzâfâtından Hasköy subaşısı olan [Mehmed] Bey nâm kimesne meclis-i şer‘-i hatîr-i lâzımü’t-tevkīrde hâmilü’l-kitâb Estati v. Dimitri ve Niko v. Mihal ve Anderya v. Yorgi ve Yorgi v. Dimitri ve Hristoli v. Toşil nâm zimmîler mahzarlarında takrîr-i kelâm edüp mezbûrûn Estati ve Niko ve Anderya ve Yorgi ve Hristoli ve Yorgi nâm zimmîleri Paşa İskelesinde pereme ile bir meyyiti su içre? çekdirip giderken üzerlerine va[r]up mezbûrûn zimmîleri şer‘-i şerîfe ihzâr edüp merkūm [zi]mmînin helâkinden suâl olundukda zikri sebk eden zimmîlerden Estati v. Dimitri cevâb verip târih-i kitâbdan on iki gün mukaddem gāib olmuş idi. Hâlen Hritoli? (…)si kurbünde vâki‘ deryâ içinde [26] meyyiti zuhûr eden oğlum mezkûr Virgen’in dem ü diyetine müte‘allik da‘vâm ve nizâ‘ım yokdur. Taleb dahî edersem inde’l-hükkâmi’l-kirâm mesmû‘a olmasın dedikde mukırr-ı mezbûrun vech-i meşrûh üzre cârî olan ikrârın el-mukarru lehu’l-merkūm Mehmed Subaşı? vicâhen ve şifâ[hen] tasdîk ve tahkīk etmeğin vâki‘ hâl gıbbe’t-taleb ketb olundu. Tahrîren fî evâhir-i Cumâdelûlâ li-sene erba‘a ve işrîn ve elf. Şuhûdü’l-hâl: Mehmed b. Mustafa, Mehmed Bey [b.] Abd, Murad Bey b. Hüseyin ve gayruhum