Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 73 Hüküm no: 65 Orijinal metin no: [28-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Semhan bt. İsak’ın Ahmed Çelebi mahallesindeki mülklerini satması Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Semhan bt. İsak meclis-i şer‘-i hatîr-i lâzımü’t-tevkīrde hâmilü’l-kitâb Abraham v. Mosi mahzarında ikrâr-ı tâm ve takrîr-i kelâm edüp akd-i âti’z-zikrin sudûruna değin silk-i mülk-i sahîhimde muntazam olan emlâkimden mahâll-i mezbûrede vâki‘ bir tarafı Davud v. Abraham mülküne ve bir tarafı Lazar v. Yasef mülküne ve iki tarafı tarîk-ı âmma müntehî ve mahdûd olan iki bâb tahtânî ve iki bâb fevkānî evlerimi ve müştemil olduğu iki su kuyusunu ve iki matbahı ve iki fırını ve iki mahzeni ve iki kenîfi ve cüneyne ile mezbûr Abraham’a fıddî-i Osmânî nakd-i râyicü’l-vakt kırk sekiz bin akçeye bey‘ edüp kabz-ı semen-i mezkûr ve teslîm-i mebî‘ eyledim dedikde mukırr-ı mezbûrenin vech-i meşrûhası üzre cârî olan ikrârın el-mukarru lehu’l-merkūm İbrahim vicâhen tasdîk ve şifâhen tahkīk etmeğin vâki‘ hâl gıbbe[‘t-]taleb ketb ve tâlibi yedine li-ecli’t-temessük def‘ olundu. Tahrîren fî-evâil-i Recebi’l-mürecceb li-sene erba‘a ve işrîn ve elf. Şuhûdü’l-hâl: Mehmed Çelebi b. Mustafa, Mehmed Çelebi b. Hasan, Osman Bey b. Mustafa es-sarrâc, Ramazan b. Ali Surûrî, Abraham v. Farkeko, Mosi v. Munyon, İsak v. Baruh, Saharya v. Mosi, Kurt v. Menahim, Selho v. Yahûda, Mosi v. Yarka ve gayruhum