Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 76 Hüküm no: 70 Orijinal metin no: [30-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüsselam mahallesinde Irazi Hatun Vakfı’na ait boş arsanın kiraya verilmesi Havâss-ı aliyye muzâfâtından Hasköy nâm karye mahallâtından Abdüsselam mahallesinde vâki‘ merhûme Irazi Hatun’un vakfına mütevellî olan Muzaffer Halîfe el-imâm mahfil-i kazâda Dilaver Bey b. Abdullah ve zevcesi Sâliha Hatun bt. Abdullah mahzarlarında takrîr-i kelâm edüp vakf-ı mezbûrdan mahalle-i mezbûrede vâki‘ beyne’l-ahâlî ve’l-cîrân hudûdu ma‘lûm olan ve tûlen arzan bi-hisâb-ı şatrancî dört yüz seksen zirâ‘ arz-ı hâliyenin eser-i binâdan bir şey olmamak ile ve cânib-i vakfda dahî ta‘mîre vüs‘at olmayup îcâr olunmak vakf-ı şerîfe her vechile nef‘ olmağın ben dahi tevliyetim hasebiyle cânib-i vakf içün mezbûr Dilaver’den ve Sâliha Hatun’dan iki bin akçe icâre-i mu‘accele ve senede üçer yüz akçe müeccele ile müddet-i ma‘lûmeye îcâr ve teslîm edüp ve zikrolan icâre-i mu‘accelesin mezbûrân yedlerinden bi-tamamihî cânib-i vakf içün aldım kabz eyledim dedikde mütevellî-i mezbûrun minvâl-i meşrûh üzre cârî olan ikrârını mezbûrân Dilaver Bey ve zevcesi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Şuhûdü’l-hâl: Ahmed Çelebi el-Hammam[î], Ali Halîfe b. Mehmed, Yahya Çelebi b. İbrâhim