Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 75 Hüküm no: 69 Orijinal metin no: [29-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülbeki v. Aro’nun, eşi Kortese’yı vekili vasıtasıyla boşaması Mahmiye-i İstanbul mahallâtından Cibali mahallesinde sâkin iken mukaddemâ gāib ani’l-meclis olan Gülbeki v. Aro nâm Ermeni’nin husûs-ı âti’z-zikre vekîl olup vekâleti hasm-ı şer‘î-i câhid mahzarında Nikola v. Yagop ve Gazal v. Farak nâm Ermeniler şehâdetleriyle sâbite olup mezbûr Gülbeki’nin babası Aro meclis-i şer‘-i şerîfde Gülbeki’nin zevcesi Ko[rtese] [muvâcehe]sinde bi’l-vekâle ikrâr ve tak[rîr](…) [30] sâlifü’z-zikr Gülbeki beni zevcesi mezbûre Kortese’yi tatlîke ve mehir ve nafakasın ve v. sagīrinin terbiyesi mukābelesinde yirmi aded riyâl guruş def‘ etmesine beni vekîl eylemişidi. Hâlen vekâlet-i mahkiyem hasebiyle mezbûr Kortese’yi vekâleten tatlîk eyledim ve zikrolunan meblağı dahi mezbûreye teslîm eyledim. Ol dahî tesellüm ve kabûl ve müvekkilimin mâ‘adâ hukūk-ı zevciyeden zimmetini ibrâ eylemişdir. Suâl olunup takrîri tahrîr olunmak matlûbumdur dedikde vekîl-i mezbûrun minvâl-i muharrer üzre cârî olan takrîrin mezbûre Kortese bi’l-muvâcehe tasdîk edicek ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Ve hurrire zâlike fi’l-yevmi’l-işrîn min-şehr-i Rebî‘i’l-âhir li-sene selâse ve hamsîn ve elf. Şuhûdü’l-hâl: Yusuf Beşe b. Sinan, Arzuman v. Umurcan, Agop v. Ferhad