.:: İstanbul Kadı Sicilleri ::.


Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 78
Hüküm no: 76
Orijinal metin no: [32-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Musa Efendi’nin Hasköy’de Pîrî Paşa Vakfı’ndan kiraladığı arsada yaptırdığı binaların keşfine dair

Bi’l-fi‘il atebe-i aliyye-i sultâniyede şehremîni olan kıdvetü’l-ekâbir ve’l-a‘yân makbûlü’s-sadri ve’l-erkân Musa Efendi b. Mehmed meclis-i şer‘-i şerîf-i lâzımü’t-teşrîfde merhûm Pîrî Paşa Vakfı’na hâlen mütevellî olan Zuhûri Efendi b. [Der]viş mahzarında takrîr-i kelâm ve ta‘bîr ani’l-merâm edüp Havâss-ı aliyye kazâsına tâbi‘ Hasköy nâm kasabada vâki‘ merhûm-ı mezbûr Pîrî Paşa Vakfı’ndan olup bir tarafdan Havva Hatun bostanı ve bir tarafdan vâdî ve bir tarafdan Pîrî Paşa-yı mezbûr vakfı ve bir tarafdan tarîk-ı âm ile mahdûd olup icâre-i mu‘accele-i ma‘lûme ve ücret-i mu‘ayyene ile mutasarrıf olduğum bir kıt‘a bostanın tûlen ve arzan bi-hisâb-ı terbî‘î ( ) zirâ‘ arsası mukaddemâ ifrâz ve senevî yüz seksen akçe mukāta‘a ile mutasarrıf olduğum selâmlık tarafından sâhil-i bahre varınca ve yine dâhiliyede vâki‘ senevî iki yüz akçe mukāta‘a ile mutasarrıf olduğum arsa üzerine yine sâhil-i bahre varınca binâsı mülküm olmak üzre merkūm Zuhûri Efendi’nin izin ve ma‘rifeti ile fevkānî ve tahtânî büyût-ı adîde ve hammâm ve matbah ve hucurât ve kilâr ve havuz binâ ve ihdâs etmişdim. Hâlen mülküm olmak üzre binâ ve ihdâs eylediğim ebniyenin tahammülü tahmîn olunmak murâdımdır dedikde savb-ı şer‘den bu fakīr ve hâssa mi‘mârlardan Üstâd el-Hâc Hasan b. Mehmed ve zeyl-i kitâbda isimleri mastûr olup ebniye ve sukūf ahvâline vukūfu olan Müslimîn ile menzil-i mezbûrun üzerine varılıp keşf ve müşâhede olundukda menzil-i mezbûru tûlen ve arzan bi-hisâb-ı mezbûr üç yüz zirâ‘ taş duvarına zirâ‘ı seksener akçeden yirmi dokuz bin altı yüz akçe ve duvar-ı mezkûrun temeline ve yan duvarına ki cem‘an dört yüz doksan zirâ‘ olup her bir zirâ‘ı altmışar akçeden yirmi dokuz bin dört yüz akçe ve sekiz yüz yirmi sekiz zirâ‘ döşemesine ellişer akçeden kırk bir bin dört yüz yirmi beş akçe ve otuz zirâ‘ dolma duvarı zirâ‘ı otuzar akçeden yedi bin on akçe ve yüz elli beş zirâ‘ münakkaş ve kafesli tavan seksener akçeden on iki bin dört yüz akçe ve beş yüz kırk dört zirâ‘ sâde tavanına yirmi bir bin sekiz yüz altmış akçe ve dokuz yüz otuz üç zirâ‘ cedîd sakfına ellişer akçeden kırk altı bin altı yü[z] elli akçe ve yedi yüz yetmiş sekiz zirâ‘ tahta döşemesine kırkar akçeden otuz bin yüz yirmi akçe ve otuz altı zirâ‘ kaygan döşemesine yetmişer akçeden iki bin beş yüz yirmi akçe ve dört yüz kırk beş zirâ‘ tahta perdesine on beşer akçeden altı bin altı yüz yetmiş beş akçe diğeri sekiz aded sâde demir pencerelerine on sekiz bin (…) yüz akçe ve fevkānî duvarın yetmiş aded camlarına ikişer yüz ellişer (…) beşyüz akçe ve tahtânî duvarın sekiz aded(…) altı yüz akçe (…) [kaydın devamı yoktur].