Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 79 Hüküm no: 77 Orijinal metin no: [33-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in Sarı Murad isimli şahsa emanet ettiği elbiselerini talebi Havâss-ı Kostantıniyye muzâfâtından Hasköy mahallâtından Ahmed Çelebi mahallesinde mütemekkin Şerif Ali Bey b. Abdullah mahfil-i kazâda Sarı Murad v. ( ) ihzâr ve mahzarında takrîr-i da‘vâ edüp târih-i kitâbdan mukaddem mezbûr Sarı Murad silk-i mülkümde münselik olan esbâblarımdan bir mor yağmurluğum ve bir yeşil iskarlet ferâcem ve mor tulumum ve iki mütellâ dülbendimi ve bir kumaş yeni kaftanım ve bir şeker kadife yeni kaftanımı ve bir kırmızı ediğimi ve bir kırmızı şalvarımı ve bir mütellâ dülbendimi ve bir turh? tuzluğu ve bir çift gömlek işleri ve bir çift makrame ve bu cümle mecmû‘-ı esbâbları Müslimânlar huzûrunda bir yeni peştemal içinde bulunup mezbûr Sarı Murad’a emânet vaz‘ eyledim. Suâl olunup alıverilmesi matlûbumdur dedikde gıbbe’s-suâl mezbûr Sarı Murad hazır olup fi’l-vâki‘ müdde‘î-i mezbûr Ali Bey zikri sebk eden esbâbların cümlesin getirip evimde emânet vaz‘ edüp ben dahi alıp kabz eyledim. Lâkin ben evde değil iken mûmâ-ileyh Ali Bey tarafından adam gelip ehlim olan ona teslîm eyledi deyü cevâb vericek müdde‘î-i mezbûr Ali Bey mezbûr Sarı Murad’ın vech-i meşrûh üzre olan ikrâr ve i‘tirâfını talebiyle ketb olunup ve kıymet-i esbâb ve eşyâlarının isbâta muhtâc oldukları ecilden mâ hüve’l-vâki‘ bi’t-taleb ketb olundu. Hurrire fî-evâhir-i âhir-i Rebî‘ li-sene selâse ve selâsîn ve elf. Şuhûdü’l-hâl: İbrâhim Bey b. Mustafa er-râcil, Osman Bey b. Mustafa es-sarrâc-ı Sultânî, Mehmed b. Ali er-râcil, Mustafa b. Ali es-sarrâc-ı Sultânî, Hasan Paşa b. Abdullah ve gayruhum