Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 83 Hüküm no: 84 Orijinal metin no: [35-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah’ın Turşucuzâde Hüseyin Çelebi mahallesindeki evini satması Havâss-ı aliyye kazâsı[na] tâbi‘ Hasköy mahallâtından Turşucuzâde Hüseyin Çelebi mahallesinde sâkine Rahime bt. Abdullah nâm hatun meclis-i şer‘-i şerîf-i lâzımü’t-teşrîfde işbu râfi‘u’l-kitâb İlyas b. Mahmud nâm kimesne mahzarında bi’t-tav‘i’s-sâf ikrâr ve i‘tirâf edüp mahalle-i mezbûrede vâki‘ bir bâb beyt-i süflî ve bir sofayı ve zât-ı eşcâr-ı müsmire ve gayr-ı müsmireyi müştemil olup bir tarafı Mehmed b. Abdullah mülkü ve iki tarafı merhûm Turşucuzâde Hüseyin Çelebi Vakfı ve bir tarafı tarîk-ı âmla mahdûd ve mümtâz olan mülk menzilim cümle tevâbi‘ ve levâhıkı ile mezbûr İlyas’a fıddî râyic fi’l-vakt dört bin yüz elli akçeye bey‘ edüp kabz-ı semen-i ma‘dûd ve teslîm-i mebî‘-i mahdûd eyledim. Ol dahî vech-i mübeyyen üzre iştirâ ve tesellüm eyledi. Ba‘de’l-yevm zikrolunan menzil-i merkūm İlyas’ın mülk-i müşterâsıdır. Keyfe mâ yeşâ ve yahtâr mutasarrıf olsun dedikde mukırra-i merkūmun minvâl-i muharrer üzre sudûr ve zuhûr eden ikrâr ve i‘tirâf[ın]da el-mukarru lehu’l-mezkûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Tahrîren fî-evâil-i Cemâziyelâhir li-sene erba‘a ve selâsîn ve elf. Şuhûdü’l-hâl: Mustafa Bey b. Ebûbekir el-Cündî, Mehmed Çelebi b. Ahmed el-Cündî, Osman Bey [b.] Mustafa Sarrâc-ı Hâssa, Veli Beşe b. Abd er-râcil, İbrâhim Reis b. Davud, Seyyid Ali b. Nasuh er-reîs, Müstedam Bey b. Abullah, Ahmed b. Hacı, Mehmed b. Mustafa el-muhtesib