Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 83 Hüküm no: 83 Orijinal metin no: [34-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miras payı için vekil tayini Medîne-i Ebî Eyyûb el-Ensârî -aleyhi rahmeti’l-Bârî- muzâfâtından Hasköy mahallâtından Pîrî Paşa mahallesinde (…) mezbûrda sâkin Yorgi v. Losna nâm zim[mî] [35] Hasköy’de sâkine orta cemâ‘atinden Mosi v. Yahûda nâm Yahûdî’ye meclis-i şer‘de cemâ‘at-i mezkûreden Alkına v. Yahûda nâm Yahûdî mahzarında takrîr-i kelâm ve ta‘bîr ani’l-merâm eyleyüp bundan akdem Kostantıniyye’de sâkine iken mürd olan yine orta cemâ‘atinden baba bir kız karındaşım Fedon v. Yahûda nâm Yahûdiyye’den bana irs-i şer‘le intikāl eyleyen hisse-i şer‘iye-i şâyi‘amı tereke-i mezkûreye vaz‘-ı yed eyleyen mezbûre Fedon’un zevci, zahriye ve sulbiye kızları Efdabola ve Hondi’den taleb ve da‘vâya ve muhallefât-ı mesfûreden bi-hasebi’ş-şer‘ bana âid ve râci‘ olanı ahz u kabza tevkîl-i sahîh-i şer‘î ile tevkîl eyledim. Vekâlet-i sahîha ile vekîlim olsun dedikde mezbûr Alkına dahi vekâlet-i mesfûreyi kabûl eylemeğin mâ hüve’l-vâki‘ gıbbe’t-taleb ketb ve tahrîr olundu. Tahrîren fî-( ) Cumâdelûlâ li-sene erba‘a ve selâsîn ve elf. Şuhûdü’l-hâl: Ahmed Halîfe b. Cafer el-imâm, Abbas Efendi bin Davud, el-Hâc Şahman b. Abdullah, Cafer b. Abdullah.