Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 76 Hüküm no: 47 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çıkrıkçı dükkânını elinde bulunduran Şaban’ın dükkânın yarı hissesini hak sahibi olan Şerife Sakine Hatun’a vermesi Mahmiye-i İstanbul’da Çırakçı Mahallesi sâkinlerinden olup ba‘dehû diyâr-ı Mısriye’de muvakkaten Bahire kādısı iken bundan akdem medîne-i Mısır’da müteveffâ olan es-Seyyid Mehmed Efendi b. Mustafa nâm kimesnenin sulbiye kızı olup hâlâ medîne-i merkūmede mutavattıne olan işbu bâ‘isetü’l-kitâb zahru’l-muhadderât tâcü’l-mestûrât Şerife Sakine Hatun tarafından vech-i âtî üzere olan da‘vâ ve ityân-ı beyyinâta vekîl olup yedinde olan hüccet-i şer‘iyye ile vekâleti sâbite olan fahrü’l-kuzât Süleyman Efendi b. İbrahim meclis-i şer‘-i hatîr-i lâzımü’t-tevkīrde dükkân-ı âti’l-beyân yedinde idiği şer‘an ma‘lûm olan Şa‘ban b. ( ) nâm kimesne mahzarında üzerine bi’l-vekâle da‘vâ ve takrîr-i kelâm edip merhûm Murad Paşa-yı Atîk Evkāfı’ndan mahmiye-i merkūmede Uzunçarşı’da Katırhanı kurbünde vâki‘ lede’l-ahâlî ve’l-cîrân ma‘lûmü’l-hudûd olup el-ân mezkûr Şa‘ban’ın tasarrufunda olan bir bâb harrât dükkânı mukaddemâ mezbûr es-Seyyid Mehmed Efendi’nin hâl-i hayâtında ücret-i mu‘accele ve ayda ü[ç] yüz akçe icâre-i müeccele ile tasarrufunda olup ba‘de vefâtihi ale’s-seviyye sulbî oğlu es-Seyyid Mustafa Çelebi’ye ve sulbiye kızı mezkûre Şerife Sakine Hatun’a râci‘ olup mezbûr es-Seyyid Mustafa bilâ-veled müteveffâ oldukda dükkân-ı mezbûrun nısf hisse-i şâyi‘ası taraf-ı vakfa râci‘ olup mezkûre Şerife Sakine âhar vilâyetde olmağla mezbûr Şa‘ban dükkân-ı mezkûrun cümlesine vaz‘-ı yed edip tasarruf eder, suâl olunup müvekkile-i merkūmenin nısf hisse-i şâyi‘asından kasr-ı yedine tenbîh olunmak taleb ederim dedikde, gıbbe’s-suâl merkūm Şa‘ban cevâbında, dükkân-ı mezbûr merkūm es-Seyyid Mustafa’nın hâl-i hayâtında tasarrufunda olup müteveffâ oldukda evlâdı olmamağla taraf-ı vakfa râci‘ olmağla vakf-ı mezbûrun ol zamânda mütevellîsi olan Hüseyin Çelebi nâm kimesne târîh-i kitâbdan bir buçuk sene mukaddem dükkân-ı mezbûrun cümlesinin hakk-ı tasarrufunu otuz bin akçeye bana tefvîz ve bedel-i tefvîzi yedimden bi’t-tamam vakfi’çün ahz u kabz edip tasarrufi’çün yedime hat ve hatemini müştemil temessük verdi, dükkân-ı merkūm mezkûr es-Seyyid Mehmed Efendi’nin hâl-i hayâtında vech-i merkūm üzere tasarrufunda olduğunu ve müvekkile-i mezbûre Şerife Sakine dahi mezbûr es-Seyyid Mehmed Efendi’nin sulbiyesi olduğunu bi’l-külliye inkâr edicek vekîl-i mezbûrdan sıdk-ı makāline beyyine taleb olundukda udûl-i Müslimîn’den mahmiye-i merkūmede Koğacı Mahallesi sükkânından el-Hâc Hüsrev b. Abdullah ve Âşıkpaşa Mahallesi ahâlîsinden Mustafa Çelebi b. Ahmed ve el-Hâc Ali Efendi b. Salih nâm kimesneler li-ecli’ş-şehâde meclis-i şer‘a hâzirûn olup gıbbe’l-istişhâd fi’l-vâki‘ dükkân-ı merkūm ücret-i müeccele ve mu‘accele ile mukaddemâ mezkûr es-Seyyid Mehmed Efendi’nin ilâ-hîni vefâtihi tasarrufunda olup ba‘de vefâtihi ale’s-seviyye sulbî oğlu mezbûr es-Seyyid Mustafa’ya ve sulbiye kızı müvekkile-i merkūme Şerife Sâkine’ye râci‘ olup merkūme Şerife Sakine müteveffâ-i mezbûr es-Seyyid Mehmed Efendi’nin sulbiye kızı ve vârisesidir biz bu husûsa şâhidleriz şehâdet dahi ederiz deyü edâ-yı şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiye hayyiz-i kabûlde vâkı‘a olmağın dükkân-ı mezbûrun nısf-ı şâyi‘inden kasr-ı yedine mezkûr Şa‘ban’a tenbîh olunup mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li-sene selâse ve sittin ve elf. Şuhûdü’l-hâl: Mustafa Çelebi b. Mustafa er-Ressâm, Fazlullah Beşe Çukadâr, İbrahim Çelebi b. Davud, Rıdvan Beşe b. Abdullah, Mehmed b. Hüseyin, Pîrî b. Hüseyin.