Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 85 Hüküm no: 87 Orijinal metin no: [36-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de Kaptan Sinan Paşa Evkafı’na ait harap bozahanenin kiracısının feragati Havâss-ı aliyye kazâsı muzâfâtından Hasköy mahallâtından Ahmed Çelebi mahallesi sükkânından Hasan b. Nasuh nâm kimesne meclis-i şer‘-i şerîf-i lâzımü’t-teşrîfde merhûm Kapudan Sinan Paşa Vakfı’na bi’l-fi‘il mütevellî olan fahrü’l-cüyûş Mehmed Çavuş b. İbrâhim Efendi mahzarında bi’t-tav‘i’s-sâf ikrâr ve i‘tirâf ve takrîr-i kelâ[m] edüp vakf-ı mezbûrdan olup havâss-ı aliyye kazâsı muzâfâtından Hasköy’de vâki‘ bir tarafı habbâz fırını ve bir tarafı deryâ ve iki tarafı Osman Ağa bağçesi ile mahdûd ve mümtâz olup icâre-i mu‘accele ve müeccele ile mutasarrıf olduğum bozahâne harâb olmağla vakf-ı merkūma icâresin vermeğe kādir olmadığım ecilden zikrolunan bozahâneyi vakf-ı mezbûra fâriğ olup vechen mine’l-vücûh alâka ve medhalim kalmadı dedikde mukırr-ı merkūmun ikrâr-ı meşrûhunu merkūm Mehmed Çavuş vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Tahrîr olunup yed-i tâlibe def‘ olundu. Tahrîren fî-evâhir-i Cumâdelû[lâ] li-sene erba‘a ve selâsîn ve elf. Şuhûdü’l-hâl: Abbas Efendi b. Davud, Mehmed Çelebi b. Mustafa, Mehmed Beşe b. Kadri, Üstâd Murad b. Abdullah, Veli Beşe b. Kulu, İsa Bey b. Mustafa es-sarrâc, Mustafa b. İbrâhim, el-Hâc Mustafa b. Abdullah, Cafer b. Abdullah