Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 85 Hüküm no: 88 Orijinal metin no: [36-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de Kaptan Sinan Paşa Evkafı’na ait bozahanenin kiraya verilmesi Mahmiye-i Galata hâricinde kasaba-i Beşiktaş’da vâki‘ merhûm Kapudan Sinan Paşa Evkāfı’na bi’l-fi‘il mütevellî olan fahrü’l-eşbâh Mehmed Çavuş b. İbrâhim Efendi meclis-i şer‘- i hatîr-i lâzımü’t-tevkīrde râfi‘u’l-kitâb Yagop v. İlya nâm Yahûdî mahzarında ikrâr ve takrîr-i kelâm edüp vakf-ı mezbûrdan olup havâss-ı aliyye kazâsı muzâfâtından Hasköy’de vâki‘ bir tarafı habbâz fırını ve bir tarafı leb-i deryâ ve iki tarafı Osman Ağa bağçesi [ile] mahdûd ve mümtâz olup eski bozahâne demekle ma‘rûf bozahâne müddet-i medîde hâlî ve mu‘attal kalmağla harâba müşrif olup mukāta‘a ile verilmesi bir vechle vakf-ı merkūma enfa‘ ve evlâ olmağın tevliyet-i mahkiyem hasebiyle mezbûr Yagop’dan vakf-ı mersûm içün iki bin akçe alıp her sene vakf-ı merkūma yüz yirmi akçe mukāta‘a ile zikrolunan bozahâneyi mezbûr Yagop’a teslîm eyledim. Mâdâmki vakf-ı merkūma âid ve râci‘ olan beher sene yüz yirmi akçe mukāta‘ayı edâ eyleye, keyfe mâ yeşâ ve yahtâr mutasarrıf ola dedikde mukırr-ı merkūmun ikrâr-ı meşrûhunda merkūm Yagop tasdîk-i vicâhî ve tahkīk-i şifâhî eylemeğin mâ hüve’l-vâki‘ bi’t-taleb ketb ve tâlibi yedine def‘ olundu. Tahrîren fî-evâil-i Cumâdelâhire li-sene erba‘a ve selâsîn ve elf. Şuhûdü’l-hâl: Abbas Efendi b. Davud, Mehmed Çelebi b. Mustafa, Mehmed Beşe b. Kadri, Üstâd Murad b. Abdullah, Veli Beşe b. Kulu, İsa Bey b. Mustafa Ser-bölük, Hasan b. İbrâhim, el-Hâc Mustafa b. Abdullah ve gayruhum